“O‘zbekiston Respublikasining Yevrosiyo taraqqiyot bankini taʼsis etish haqidagi bitimga (Ostona, 2006-yil 12-yanvar) qo‘shilishi to‘g‘risida”gi qonun Senatda ma’qullandi.
Bitimning asosiy maqsadi investitsiya faoliyati orqali unga qo‘shilgan ishtirokchi davlatlarning iqtisodiy o‘sishiga va ular o‘rtasidagi savdo-iqtisodiy aloqalarni kengaytirishga ko‘maklashishdir.
Mazkur hujjatga ko‘ra, ushbu bank o‘z faoliyatini xalqaro shartnomalar, xalqaro huquq, umumeʼtirof etilgan bank faoliyati tamoyillari va meʼyorlariga muvofiq amalga oshirishi, shuningdek, bank nizomi ushbu bitimga ilova qilingan holda tasdiqlanishi nazarda tutilgan.
Shuningdek, bank nizomida Yevrosiyo taraqqiyot banki faoliyati, maqsad va vazifalari, funksiyalari, imtiyozlari, ustav kapitali va unga obuna bo‘lish shartlari hamda bank boshqaruviga oid tartib-qoidalar belgilangan.
Bundan tashqari, Yevrosiyo taraqqiyot banki ishtirokchi davlatlarning iqtisodiyoti va moliyaviy bozorlari holati, ularning investitsiya imkoniyatlari, pul-kredit va valyuta munosabatlari, bank va valyutani tartibga solish sohasidagi qonunchilik normalari to‘g‘risidagi maʼlumotlarni to‘plashi, tizimlashtirishi va tahlil qilishi belgilanmoqda.
Senatorlarning qayd etishicha, qonunning qabul qilinishi O‘zbekistonning Yevrosiyo taraqqiyot bankiga aʼzo bo‘lishi uchun huquqiy asos yaratishga, uning faoliyati doirasida to‘liq va samarali ishtirok etish huquqini taʼminlashga, shuningdek, bankka aʼzo davlatlarning iqtisodiy o‘sishiga ko‘maklashishga, savdo-iqtisodiy aloqalarini kengaytirish va investitsiya faoliyati orqali Yevrosiyo hududida integratsiya jarayonlarini rivojlantirishga xizmat qiladi.
Yevrosiyo taraqqiyot banki (Eurasian Development Bank, EDB) xalqaro moliya tashkiloti bo‘lib, Yevrosiyo mintaqasi mamlakatlarida iqtisodiyotni, savdo-iqtisodiy munosabatlarni va integratsiya jarayonlarini rivojlantirishga qaratilgan investitsiya faoliyatini amalga oshiradi. U 2006-yilda Rossiya va Qozog‘iston tomonidan tashkil etilgan bo‘lib, 2009-yilda Armaniston va Tojikiston, 2010-yilda Belarus, 2011-yilda Qirg‘iziston ushbu bankka a’zo bo‘lgan.
O‘zbekiston Yevrosiyo taraqqiyot bankiga 2025-yilda a’zo bo‘lishni rejalashtirmoqda. Ayni paytda mamlakat ushbu bankka kuzatuvchi maqomida bo‘lib, a’zo bo‘lishga 2022-yildan buyon tayyorlanmoqda.
Izoh (0)