Birlashgan Millatlar Tashkilotining Migratsiya agentligi hisobotiga ko‘ra, yakunlangan 2024-yili 8 938 nafar muhojir halok bo‘lgan. E'tiborlisi, ularning 10 foizi zo‘ravonlik sabab vafot etgan. Bu toifaga otishma, pichoqbozlik, kaltaklash va davlat tomonidan o‘tkazilgan hujumlar qurbonlari kiradi.
Agentlik vakilining so‘zlariga ko‘ra, zo‘ravonlik natijasida eng ko‘p o‘lim holatlari Eron, Myanma, Bangladesh va Meksikada qayd etilgan.
“O‘lim holatlarining keskin o‘sishi global darajada muvofiqlashtirilgan yondashuvni talab qiladi. Fojialarning oldini olish uchun tizimli chora-tadbirlar zarur,” deydi agentlikning operatsiyalar bo‘yicha bosh direktori o‘rinbosari Ugochi Daniels.
Hisobotda eng xavfli migratsiya yo‘nalishlari sifatida Osiyo, O‘rta Yer dengizi, Afrika (jumladan, Sahroyi Kabir) hududlari keltirilgan. Ammo davlatlarning qirg‘oq qo‘riqchilari tomonidan muhojirlarni dengizga majburan qaytarish va cho‘kib ketish holatlari zo‘ravonlik statistikasi qatoriga kiritilmagan.
Izoh (0)