O‘zbekistonda ijobiy kredit tarixiga ega bo‘lgan xotin-qizlarga 100 million so‘mgacha garovsiz kredit ajratiladi. Bu haqda “Oila va xotin-qizlarni qo‘llab-quvvatlash tizimini yanada takomillashtirish chora-tadbirlari to‘g‘risida”gi prezident qarorida belgilandi.
Qarorga ko‘ra, ushbu garovsiz kredit “Hamroh” tadbirkor ayollarni qo‘llab-quvvatlash dasturi doirasida 2025-yil 1-maydan boshlab ijobiy kredit tarixiga ega bo‘lgan xotin-qizlarga ajratiladi.
Shu sanadan xotin-qizlarga “yashil loyihalar” va IT sohasidagi loyihalarni amalga oshirishiga, shuningdek, kamida 5 nafar xotin-qizning tadbirkorligini yo‘lga qo‘yishga ko‘maklashgan 1 ming nafar “ustoz” tadbirkorlarga 50 million so‘mgacha grant ajratiladi.
Ayol tadbirkorlar tomonidan kredit hisobidan sotib olinayotgan asbob-uskunalar yetkazib berilgunga qadar “Tadbirkorlikni rivojlantirish kompaniyasi” AJ tomonidan kafillik taqdim etilishi yo‘lga qo‘yiladi.
2025-yilda xotin-qizlarni qo‘llab-quvvatlashning asosiy maqsadli ko‘rsatkichlari etib quyidagilar belgilandi:
- 2 million nafar xotin-qizlarning bandligini ta’minlash;
- 250 ming nafar xotin-qizlarni kasb-hunar va tadbirkorlikka o‘qitish;
- 250 ming nafar xotin-qizlarni oliy ta’lim bilan qamrab olish;
- 50 ming nafar ehtiyojmand xotin-qizlarni sanatoriylarda sog‘lomlashtirish hamda ularda tadbirkorlik ko‘nikmalarini shakllantirish bo‘yicha motivatsion seminarlar tashkil etish.
O‘zbekistonda kreditini vaqtida to‘lagan ayol tadbirkorlarga 100 million so‘mgacha garovsiz kredit berilishi haqida 7-mart kuni Ko‘ksaroy qarorgohida Xalqaro xotin-qizlar kuni munosabati bilan o‘tkazilgan tadbirda ma’lum qilingandi.
“O‘tgan yili tashkil etilgan “Hamroh” kompaniyasi yangi tizim asosida Tadbirkor ayollarni qo‘llab-quvvatlash dasturini boshlagan edi. Bu loyihaga ham 100 million dollar ajratganmiz. Kreditini vaqtida to‘lagan ayol tadbirkorlarga ushbu dastur doirasida 100 million so‘mgacha garovsiz kredit berishni boshlaymiz”, degan edi prezident.
Davlat rahbari 2025-yilda kasb-hunarga o‘qitish, ishli qilish va tadbirkorlikni rivojlantirish hisobidan 2 million nafar ayolning bandligini ta’minlash maqsad qilinganini qayd etib o‘tgandi.
Prezident tadbirkorlikni har tomonlama qo‘llab-quvvatlash bo‘yicha 2024-yil yakunlari va 2025-yilga asosiy rejalar yuzasidan videoselektor yig‘ilishida “chempion” tadbirkorlarni ko‘paytirish kerakligini aytgandi.
Izoh (0)