Bosh prokuratura O‘zbekistonda noqonuniy daraxt kesish holatlari ortidan qancha zarar undirilganini ma’lum qildi.
Xabarga ko‘ra, daraxtlar kesilishiga e’lon qilingan moratoriy ijrosini o‘rganish bo‘yicha tashkil etilgan nazorat tadbirlari davomida 4 190 ta noqonuniy daraxt kesish holati aniqlanib, har bir nobud qilingan daraxt uchun 100 tup ko‘chatni kompensatsiya tarzida ekish majburiyati yuklanishi va davlat ixtiyoriga 8,7 milliard so‘m undirilishi ta’minlandi.
Shuningdek, ijaradagi 67 778 gektar o‘rmon fondi yer maydonlari xatlovdan o‘tkazilib, 17 ta noqonuniy qaror bekor qilindi hamda noqonuniy egallangan 1 577 gektar yer maydoni o‘rmon fondi hisobiga qaytarildi, jiddiy qonun buzilishi holatlari yuzasidan 24 ta jinoyat ishi qo‘zg‘atildi.
Nazorat tadbirlarida 65,7 milliard so‘mlik 215 ming metr kub noruda foydali qazilmalar noqonuniy qazilgani holatlari yuzasidan 45 ta jinoyat ishi qo‘zg‘atilib, tabiatga yetkazilgan 7,1 milliard so‘m zarar va 34,8 milliard so‘m kompensatsiya to‘lovlari undirildi.
Tadbirlar davomida daryolarning muhofaza zonalarida 744 ta noqonuniy chiqindi tashlash joylari bartaraf etilib, suv havzasi mintaqalari 17 200 tonna chiqindidan tozalandi.
Hozirda qayd etilgan daryolar o‘zanlarida qonunbuzilishlarning oldini olish maqsadida videokuzatuv kameralari o‘rnatish ishlari amalga oshirilib, onlayn nazorat joriy qilinmoqda.
Izoh (0)