Rossiya prezidenti Vladimir Putin Aleksandr Darchiyevni AQSHga elchi etib tayinladi. AQSH ham Moskvadagi ishonchli vakilini o‘zgartirmoqda. Bu haqda “Kommersant” xabar berdi.
Tayinlovga qadar Darchiyev Rossiya Tashqi ishlar vazirligining Shimoliy Atlantika departamenti direktori vazifasini bajargan. 2017-yildan 2024-yilgacha Rossiyaning AQSHdagi elchisi Anatoliy Antonov bo‘lgan. O‘tgan yilning kuzidan beri bu lavozim bo‘sh edi. Yangi elchisi 64 yoshda bo‘lib, Vengriyada tug‘ilgan.
U Moskva davlat universitetini tamomlagan, tarix fanlari nomzodi ilmiy darajasini olish uchun dissertatsiyasini himoya qilgan. Diplomatik faoliyatini Rossiya Tashqi ishlar vazirligining Shimoliy Amerika departamentida boshlagan, u yerda turli yillarda bo‘lim boshlig‘i, direktor o‘rinbosari va departament direktori lavozimlarida faoliyat yuritgan.
AQSH va Kanada institutining ilmiy xodimi, Rossiyaning AQSHdagi elchixonasi maslahatchisi, Rossiyaning Kanadadagi elchisi bo‘lgan. 2021-yil yanvaridan Rossiya Tashqi ishlar vazirligining Shimoliy Atlantika departamentini boshqargan.
AQSHning Moskvadagi vakili lavozimiga esa Liviya bo‘yicha maxsus vakil Richard Norland rahbarlik qilishi belgilandi. Unga qadar AQSHning Rossiyadagi elchisi lavozimini Linn Treysi egallab turgan edi.
Rossiya Tashqi ishlar vazirligiga ko‘ra, 27-fevral kuni Istanbulda ikki davlat delegatsiyalari o‘rtasida yig‘ilish bo‘lib o‘tgan. Unda tomonlar Aleksandr Darchiyevni AQSHga elchi etib tayinlash to‘g‘risida nota imzolangan. 18-fevral kuni esa Ar-Riyodda Rossiya-AQSH muzokaralari bo‘lib o‘tdi. Rossiya Tashqi ishlar vaziri Sergey Lavrov uchrashuvda o‘zaro yangi elchilar tayinlash masalasida kelishuvga erishilganini aytdi.
Izoh (0)