Shavkat Mirziyoyev 5-mart kuni korrupsiyaning oldini olish bo‘yicha ishlar natijadorligi va kelgusidagi ustuvor vazifalarga bag‘ishlangan kengaytirilgan yig‘ilishda bolani maktab yoki bog‘chaga joylashtirish, OTMga kirishdagi tanish-bilishliklar haqida gapirdi.
“Odamlar bolasini maktab yoki bog‘chaga joylashtirishda sarson bo‘lgan, ishini boshqa yo‘llar bilan hal qilishga to‘g‘ri kelgan edi. O‘tgan davrda maktabgacha va maktab ta’limi tizimida 10 dan ortiq xizmat turlari to‘liq elektron shaklga o‘tkazildi. Ushbu sohada murojaatlar soni 2,5 karraga kamaydi”, dedi prezident.
Davlat rahbari bundan 7-8 yil avval oliygohlarga o‘qishga kirishda tanish-bilishchilik avj olganini eslatib o‘tib, endilikda soha raqamlashgani, imtihonlar onlayn translyatsiya bo‘layotganini ta’kidladi. Shuningdek, avval test topshirib, to‘plagan balliga qarab, keyin oliygohni tanlash tizimi joriy qilinganini aytib o‘tdi.
“Oliy ta’limda 35 turdagi hujjatlarni inson omilisiz olishga o‘tilgani uchun sohadagi murojaatlar 2,2 baravar kamaydi”, dedi prezident.
Shavkat Mirziyoyev ilgari odamlar kredit olish uchun ko‘plab to‘siq va g‘ovlarni yengib o‘tishi kerak bo‘lganiga ham to‘xtalib o‘tdi.
“Bugunga kelib barcha banklar 100 million so‘mgacha maishiy kreditlarni inson omilisiz 5 daqiqa ichida onlayn bermoqda. Natijada oldin bu ish bilan shug‘ullangan minglab bankirlar endi mahallaga tushib, odamlarga loyiha, kredit taklif qilib, mijozini ko‘paytirish ustida ishlayapti”, dedi davlat rahbari.
Yig‘ilishda ta’kidlanishicha, davlat xaridlari bo‘yicha qonun qabul qilingani, tanlov va tender raqamlashib, sog‘lom raqobat bo‘lgani uchun o‘tgan yili 14 trillion so‘m byudjet mablag‘i tejaldi.
Izoh (0)