2024-yil davomida Qirg‘iziston bank sektori aktivlari 32,8 foizga o‘sdi. Bu ko‘rsatkich O‘zbekiston va Qozog‘istondagidan sezilarli yuqori.
Qozog‘iston bank sektori
O‘tgan yili Qozog‘iston tijorat banklarining umumiy aktivlari 19,7 foizga o‘sib, 61,56 trln tengeni tashkil etdi. Bu o‘zbek valyutasida deyarli 1,58 kvadrillion (123,7 mlrd dollar) degani. Yil davomida qo‘shni mamlakat banklarining birortasida aktivlar pasayishi kuzatilmagan.
2024-yilda Qozog‘iston bank sektorining kredit portfeli 20 foizga yoki 5,98 trillion tengega oshib, 35,84 trillion tengeni (924,7 trln so‘m) tashkil etgan.
Mamlakat tijorat banklari 2,56 trln tenge (66 trln so‘m) sof foyda ko‘rgan. Respublikadagi 21 ta bankdan oltitasida o‘zining yillik sof foydasi o‘tgan yilga nisbatan pasaygan.
O‘zbekiston banklari ko‘rsatkichlari
2024-yilda O‘zbekiston tijorat banklari (jami 36 ta) aktivlari miqdori 18 foizga o‘sib, umumiy hisobda 769,3 trln so‘mni (2023-yilda 652,1 trln so‘m) tashkil etgan. Banklar kredit portfeli 533,1 trln so‘m (2023-yilda 471,4 trln so‘m), depozitlari 308,7 trln so‘m (shundan bir yil ilgari 241,7 trln so‘m) bo‘lgan.
2024-yilda respublika tijorat banklari bir yil avvalgiga qaraganda ikki barobarga kam — 6,96 trln so‘m sof foyda olgan (2023-yilda 12,4 trln so‘m). Aksariyat davlat banklarining moliyaviy natijasi yomonlashgan, xususiy banklarda esa o‘sish kuzatilgan.
Qirg‘iziston bank sektori tez o‘sdi
2024-yilda Qirg‘iziston tijorat banklarining jami aktivlari 32,8 foizga o‘sib, 815,7 milliard somga (120 trln so‘m) yetdi. Taqqoslash uchun, 2023-yilda qirg‘iz banklarining aktivlari 614,2 milliard som bo‘lgan.
Mamlakatda 304 ta filial tarmog‘iga ega 21 ta tijorat banki faoliyat yuritmoqda. Ulardan beshtasi islom moliyalashtirish tamoyillariga muvofiq xizmatlar ko‘rsatadi.
O‘tgan yil yakunlariga ko‘ra, qo‘shni davlat banklari kredit portfeli 32,2 foizga o‘sib, 340,7 milliard somga yetgan. Depozitlari hajmi 592,4 milliard somni tashkil etgan.
Yil davomida Qirg‘iziston bank tizimining sof foydasi 31,1 milliard som (4,6 trln so‘m) bo‘ldi. Bu 2023-yildagidan (24,2 milliard som) 28,5 foizga ko‘p. Bunda isteʼmol kreditlari ulushi qariyb 77,8 foizga oshgan va 99,2 milliard somga yetgan. Ipoteka kreditlari hajmi o‘sishi 30,5 foiz bo‘lgan. Umuman olganda, yuqoridagi uch davlat orasida Qirg‘iziston banklaridagi o‘sish keskin tezlashgan.
Izoh (0)