“Yosh muhandis” respublika tanlovi 25-fevral kuni boshlanadi.
O‘zbekiston Respublikasi Raqamli texnologiyalar vazirligi huzuridagi Uzcosmos kosmik tadqiqotlar va texnologiyalar agentligi Uzum ekotizimi bilan hamkorlikda butun mamlakat bo‘ylab yoshlarning muhandislik g‘oyalari tanlovini eʼlon qiladi.
Tanlovda 12 yoshdan 20 yoshgacha bo‘lgan maktab o‘quvchilari va talabalar ishtirok etishlari mumkin. Ishtirok etish uchun ariza maishiy yoki ijtimoiy muammolarni hal qilishga yordam beradigan muhandislik loyihasining tavsifini o‘z ichiga olishi kerak — bu qariyalar uchun robot yordamchilari, chiqindilarni saralash robotlari, poyabzal tozalovchi robotlar va boshqa eng dadil konsepsiyalar bo‘lishi mumkin. Baholashning asosiy mezonlari ijtimoiy va ekologik ahamiyati, shuningdek, loyihani amalga oshirish imkoniyati bo‘ladi. Tanlov hakamlar hayʼati tarkibiga Uzcosmos, Raqamli texnologiyalar vazirligi va Uzum ekspertlari kiradi.
17-may kuni O‘zbekiston Respublikasi Raqamli texnologiyalar vazirligida g‘oliblar asarlari ko‘rgazmasi va taqdirlash marosimi bo‘lib o‘tadi.
— Har bir yirik kompaniya va buyuk ixtiro bir paytlar loyiha bo‘lgan va biz ishonamizki, butun mamlakatdan kelgan yigit-qizlar uchun bu tanlov o‘z orzularini amalga oshirishda muhim qadam bo‘ladi — xoh u o‘z biznesi bo‘lsin, xoh ixtiro, — deydi Uzum operatsion direktori Roman Lavrentyev. — O‘zbekistonda ko‘plab iqtidorli yoshlar bor va biz mamlakat kelajagini quradigan bo‘lajak muhandislarni qo‘llab-quvvatlashdan mamnunmiz.
— Turkiy davlatlar tashkilotiga aʼzo mamlakatlarning kosmik agentliklari bilan hamkorlikda tashkil etilgan xalqaro loyihada 2023-yildan buyon ishtirok etib kelmoqdamiz. Albatta, bu kabi tadbirlar kosmik sohada isteʼdodlar bazasini yaratish, ularning tajribasini oshirish, yoshlarni sohadagi eng so‘nggi yechimlar bilan muntazam tanishtirib borishga ko‘p jihatdan xizmat qiladi. Agentlik bu sohadagi faol yigit-qizlarni qo‘llab-quvvatlashga doim tayyor, — dedi Uzcosmos direktori Shuhrat Qodirov.
G‘oliblarni tanlov tashkilotchilari tomonidan turli sovg‘alari kutmoqda. Shuningdek, maktab o‘quvchilari o‘rtasida “Eng kreativ loyiha” nominatsiyasi ham ko‘zda tutilgan.
G‘olib ishtirokchi yoki jamoa maxsus sovrin — Guhem xalqaro kosmik markaziga sayohatga yo‘llanma oladi https://www.guhem.org.tr/. Yevropadagi eng yirik va dunyodagi eng yaxshi beshtalikka kiruvchi ushbu markazda yoshlar astronomiya, fizika, biologiya, kimyo va boshqa fanlar bo‘yicha yangi bilimlarga ega bo‘lishlari mumkin. O‘quvchilar kosmik yo‘ldoshlarni modellashtirish, aviatsiya tizimlari bilan tanishadilar va kosmik modellashtirishda ishtirok etadilar.
Tanlovda ishtirok etish uchun quyidagi sayt orqali ariza topshirish kerak: https://futureengineers.cmspace.uz/, loyiha tavsifini biriktirish va qisqa videoni yuborish. Ishtirok etish uchun arizalar 30-martgacha qabul qilinadi.
Sheriklik huquqi asosida.
Izoh (0)