O‘zbekiston jinsilar arzonligi bo‘yicha dunyoda 21-o‘rinni egalladi

MDH davlatlarida eng arzon jinsini O‘zbekistonda sotib olish mumkin, deb xabar bermoqda Ranking.

Numbeo maʼlumotlariga ko‘ra, jinsilarning arzonligi bo‘yicha O‘zbekiston dunyo bo‘yicha 98 ta mamlakat ichida 21-o‘rinni, erkaklar charm poyabzali bo‘yicha — 72, krossovkalar bo‘yicha — 84, yozgi ko‘ylaklar bo‘yicha — 75-o‘rinni egalladi.

Qayd etilishicha, dunyoda eng arzon jinsilar Keniyada sotiladi (15,2 dollar). Eng arzon erkaklar charm poyabzallari Nepalda (31,1 dollar), eng arzon krossovkalar va yozgi liboslar Bangladeshda sotiladi.

Shveysariya aholisi jinsilar, erkaklar charm poyabzali va krossovkalarni eng qimmat narxda sotib olishiga to‘g‘ri keladi. Yozgi kiyimlar esa ko‘proq Argentinada qimmat narxlarda sotiladi.

MDH davlatlari orasida jinsi O‘zbekistonda arzonroq narxda sotiladi (43,5 dollar). Erkaklar charm poyabzali Ozarbayjonda, krossovka va ko‘ylaklar Ukrainada nisbatan arzonroq.

Qozog‘istonda — jinsilar (73, 4 dollar), Moldovada — erkaklar charm poyabzali (112,1 dollar), Ozarbayjonda — krossovka (113,7 dollar) va ko‘ylaklar (54,7 dollar) narxi qimmatroq ekanligi ma’lum bo‘ldi.

Kiyim-kechaklar narxini tahlil qilishda Levi’s kabi va shunga o‘xshash jinsilar, Nike kabi kompaniyalar krossovkalari, Zara, H&M kabi firmalar yozgi ko‘ylaklari narxlari taqqoslangan. 

Bundan avval O‘zbekiston pishloqning qimmatligi bo‘yicha 99 ta davlat orasida 79-o‘rinni egallagani haqida xabar berilgan edi.