Prezident matbuot kotibi Sherzod Asadov Qozog‘istonning ko‘plab yetakchi OAVlarini birlashtirgan holding asoschisi bilan uchrashuv o‘tkazdi.
Xabarga ko‘ra, bugun, 25-fevral kuni Qozog‘istonning Tengrinews, “Massaget”, “Vesti”, “Juldiz FM”, “Tengri FM” va boshqa ko‘plab yetakchi ommaviy axborot vositalarini birlashtirgan Alash Media Group holdingining asoschisi va bosh direktori Zaure Kazibayeva bilan uchrashuv bo‘lib o‘tgan.
“Ikki davlat rahbarlarining siyosiy irodasi va birgalikdagi sa’y-harakatlari tufayli O‘zbekiston—Qozog‘iston munosabatlari misli ko‘rilmagan darajaga ko‘tarilganini mamnuniyat bilan qayd etdik”, deydi prezident matbuot kotibi.
Shuningdek, uchrashuvda media sohasida o‘zaro manfaatli hamkorlikni rivojlantirishga oid masalalarning keng doirasi batafsil muhokama qilingan. Bu qardosh xalqlar o‘rtasidagi do‘stlik rishtalarini mustahkamlashga xizmat qilishi haqida fikr bildirildi.
Ommaviy axborot vositalarga qo‘shma loyihalarni amalga oshirishda, jumladan, kontent almashish, press-turlar uyushtirish, O‘zbekiston va Qozog‘istonning boy tarixiy va madaniy merosini xalqaro miqyosda ilgari surishda ularga har tomonlama ko‘maklashishga kelishib olingan.
Shu o‘rinda qayd etish joiz, Alash Media Group holding vakillari “Daryo” ofisiga ham tashrif buyurdi va o‘zaro hamkorlik aloqalarini yo‘lga qo‘yish masalalari muhokama qilindi.
Izoh (0)