O‘zbekiston xalq artisti Og‘abek Sobirov 24-iyun kuni 50 yoshini qarshiladi. Faoliyati davomida 30 dan ortiq musiqiy albom, 300 dan ortiq mualliflik qo‘shiqlar ijod qilgan Og‘abek Sobirovning ijodi va hayoti haqida so‘z yuritamiz.
Og‘abek Sobirov 1972-yil, 24-iyun kuni Xorazm viloyati, Urganch shahrida, temiryo‘lchi Karim ota xonadonida dunyoga kelgan. Ilk musiqiy saboqlarni akasi Maqsud Sobirovdan olgan. 1978-yil 9-o‘rta maktabiga, 1983-yilda 3-musiqa maktabiga o‘qishga kiradi. Musiqa maktabidan so‘ng Urganch shahrida joylashgan san’at kollejida tahsil olgan. Og‘abek Sobirov ko‘plab musiqiy tanlovlarda muvaffaqiyatli ishtirok etgan.
Filarmoniya binosidan AQShgacha…
Ilk yakkaxon konsertini 21 yoshida Filarmoniya binosida taqdim qilgan xonandaning bu boradagi natijalari hayratlanarlidir. Og‘abek Sobirov poytaxtda 30 ga yaqin, viloyat va tumanlarda 200 dan ortiq yakkaxon konsertlar muallifi bo‘lgan.
Bundan tashqari AQSh, Germaniya, Fransiya, Belgiya, Kanada, Turkiya, Malayziya, Hindiston, Rossiya, Eron, Janubiy Korea, Vengeriya, Qozog‘iston, Qirg‘iziston, Tojikiston, BAA, Isroil, Xitoy, Turkmaniston davlatlarida bir necha marotalab yakkaxon konsert dasturlarini taqdim etgan.
“Xorazm bulbuli” e’tirofidan davlat unvonlarigacha…
Davlat mukofotidan avval muxlislarning “Xorazm bulbuli” degan e’tirofiga muyassar bo‘lgan Og‘abek Sobirov O‘zbekistonda xizmat ko‘rsatgan artist unvoniga 2002-yilda, O‘zbekiston xalq artisti unvoniga esa 2020-yilda munosib ko‘rilgan.
O‘zbekiston xalq artisti unvonini nisbatan kech olgani haqidagi gap-so‘zlarga xonandaning o‘zi quyidagicha munosabat bildirgan edi.
San’atkor uchun unvon “Avvalroq berilishi kerak edi” deyilgan gaplarni eshitishning o‘zi katta baxt. Masalan, “Iye, sizga ham berdimi? Tavba”, desa nima qilardim. Unda bu narsani keragi bo‘lmasdi. Chunki u sharaf bo‘lmaydi. Odamlarning ko‘zida soxta san’atkor bo‘lib gavdalanib qolasiz.Og‘abek Sobirov, O‘zbekiston xalq artisti
Tilla otdan pulchambargacha…
Odamlar orasida “Turkmaniston prezidenti Og‘abek Sobirovga tilla ot sovg‘a qilgani uchun, uni davlat tadbirlariga qo‘yishmayapti”, degan gap-so‘zlarga Og‘abek Sobirov uydirma, bo‘lmagan mish-mishlar deya munosabat bildirgan edi.
Og‘abek Sobirov unga qo‘shiq qilib aytish topshirilgan she’rni aytmagani uchun uni yoqtirmaydiganlar ko‘paygani, davlat tadbirlaridan chetlashish sabablari haqida shunday deydi:
Birovga yoqish-yoqmaslik hamma davrda ham bo‘lgan. Masalan, meni ham to‘g‘risini aytishim kerak, o‘sha paytda 15-16 yillar avval kimlarningdir she’rini aytishim kerak bo‘ldi. Shu she’r menga yoqmadi, tanamga singdirolmadim. Qo‘pol qilib aytganda, o‘sha she’rni qo‘shiq qilib aytgim kelmadi. Keyin bu qo‘shiq aytilmadi, shundan boshlandi bu narsa.Xalqimizning to‘ylarida ko‘proq bo‘lamiz, bir-ikki kun qolganda “tezda tadbirga yetib keling”, degan davlat chaqiriqlari bo‘lib qoladi. Bormaslikning iloji yo‘q, lekin bu yerda to‘yga aytilganmiz, oylab kutgan odamlar bor, odamlar niyat qilishadi, qancha harakat va orzu niyatlar bilan qilinayotgan to‘yga bir kun qolganda “Borolmayman”, deb aytishni tasavvur qilib ko‘ring. Ularni o‘rniga o‘zingizni qo‘yib ko‘ring. Vijdonim qiynalardi, to‘yni tashlab, u yerga borolmasdim. Har kim har xil tushunishi mumkin. Birov “Pulni deb, ozgina mablag‘ ko‘ziga yaxshi ko‘rindi-yu, davlatning bepul tadbiri ko‘ziga ko‘rinmadi”, deyishi mumkin, lekin unaqa emas.
Har kimning sharoiti har xil. Kambag‘al odam niyat qiladi. Men borolmasam yuzimga shart aytadi: “Va’da berdingmi? To‘yning sanasini o‘zing belgiladingmi? So‘ragan pulingni berdimmi? Kelasan. Tamom”.
Xo‘sh nima deb javob qaytarish mumkin? Ushbu savolga hali hanuzgacha hech kimdan qoniqarli javob eshitmaganman. Shu narsalar asta-sekin meni davlat tadbirlaridan chetlashishimga sabab bo‘ldi deb o‘ylayman.
Og‘abek Sobirov, O‘zbekiston xalq artisti
Og‘abek Sobirov o‘zbek to‘ylaridagi eng talabgir xonandalardan biri hisoblanadi. 2022-yilda 50 yoshni qarshilagan bo‘lishiga qaramasdan, xonanda ushbu reytingda peshqadam bo‘lib turibdi. Uni muxlislari juda yaxshi ko‘radi, shu qadar yaxshi ko‘rishganidan AQSh dollarlaridan tayyorlangan pulchambarlarni to‘ylarda uning bo‘yniga ilib qo‘yishadi.
Ikkinchi marta uylangani rost, qaynisinglisga uylangani esa yolg‘on…
Og‘abek Sobirovning hayotida ko‘pchilik o‘ylagandek faqat yutuqlar, g‘alabalardan iborat bo‘lmagan. U hayotidagi eng yomon hodisa haqida shunday deydi:
Qaynsinglimga uylanmaganman. Ayolim qarindoshimiz, tog‘amni qizi bo‘lgan. Eslasam boshqacha bo‘lib ketaman. Hayotda eng ezilgan davrim, bu davrni eslasam xuddiki o‘sha hayotga yana qaytgandek bo‘laman. Yaram yangilanadi. Bu hayotda mening yuragimni jarohatlagan eng katta hodisa shu yo‘qotish bo‘ladi. Bunday taqdirni hech kimga, hech qachon ravo ko‘rmayman.Kinodagi birinchi va oxirgi bosh roli haqidaOg‘abek Sobirov, O‘zbekiston xalq artisti
Og‘abek Sobirov o‘zini kino olamida ham sinab ko‘rgan. U aktyor sifatida “Qizg‘aldoq” deb nomlangan filmda bosh rolni ijro etadi. Ushbu film ham, film uchun yozilgan maxsus qo‘shiq ham juda ommalashgan. Film haqida Og‘abek Sobirov quyidagi fikrlarni aytib o‘tgan.
Oilamizdagi mudhish voqea, farzandlarimizning onasi olamdan o‘tgandan keyin ularni bir umrga eslatib turadigan yodgorlik sifatida kino suratga olsak degan maslahatlar bo‘lgan. Bu taklifni kutmagan edim. O‘ylab qarasam bu ham savob, ibrat bo‘ladi. Mikoyil Sulaymonov film ssenariysini yozgan, Ibrohim Rasulov filmni suratga olgan. Bu film asosan real voqealarga asoslangan.Xalq artistlari tan olgan Og‘abek SobirovOg‘abek Sobirov, O‘zbekiston xalq artisti
Xalq artistlari Og‘abek Sobirov haqida, uning o‘zbek san’atida tutgan o‘rni, salohiyati haqida quyidagi fikrlarini gapirib berishdi.
Har kasbda o‘zining kasbini topgan insonga Alloh omadini beraverar ekan. Menimcha, bu kasbda Og‘abek Sobirov ham o‘zini topganlardan. U nafaqat san’atkor, balki ko‘p san’atkorlarga rahbarlik qilib kelayotgan ijodkordir.
Yulduz Usmonova, O‘zbekiston xalq artisti
Og‘abek haqida ko‘p gapirish mumkin. Og‘abek ulug‘ san’atkor, Xorazmning baxti u. Ko‘plab shogirdlari uning ketidan boradi, chunki u to‘g‘ri yo‘lda, ustozlarning yo‘lidan yurgani uchun, uning ham yo‘lidan yuradigan shogirdlari chiqaveradi.
G‘ulomjon Yoqubov, O‘zbekiston xalq artisti
Har bir san’atkor hayotda maqsad bilan yashaydi, Og‘abek maqsadiga erishgan san’atkorlardan bittasidir. Xalq uchun, yurt uchun qo‘shiq aytib, o‘z o‘rnimni topishim kerak degan maqsadiga erishgan san’atkor. Aytganda ham o‘zbekni, millatni yuragidagi dard, nolani topib aytdi. Boshqa millatni kuyiga so‘z qo‘yib aytayotgani yo‘q. Uni yurtimiz, xalqimiz sevadi.
Abduhoshim Ismoilov, O‘zbekiston xalq artisti
Ma’lumot uchun, O‘zbekiston xalq artisti Og‘abek Sobirov bugungi kunda “Lazgi” badiiy ashula va raqs ansanbli rahbari hisoblanadi.
Izoh (0)