“Ichgani suvi ham yo‘q — u yerdagi suv ichishga yaroqsiz ekan”. Shoir Shamsiddin Sadoiy og‘ir ahvolda Zangiotadagi YuKShda yotgani ma’lum bo‘ldi

Shoir Shamsiddin Sadoiy pnevmoniya tashxisi bilan Zangiotadagi yuqumli kasalliklar shifoxonasida og‘ir ahvolda yotibdi. “Fikrat.uz” shoirning rafiqasiga asoslanib xabar berishicha, shoir “uch kun avval komadan chiqqan”, hozir ham reanimatsiyada qolmoqda.

“Hozir reanimatsiyada yotibdi, ahvolini ham aniq bilolmayapman. Ba’zida do‘xtirlar telefon qiladi. Ichadigan suvi ham yo‘q ekan, suv keltirib beryapman. U yerdagi suv ichish uchun yaroqsiz ekan”, — deydi shoirning turmush o‘rtog‘i Iqbol Ergasheva.

Ayolning ta’kidlashicha, shifokorlar ba’zida bemor uchun ovqat keltirib berishni so‘raydi, “lekin ovqat keltirib berolmayapman, qo‘limda pulim yo‘q”. “Hozir bir o‘zim qolib ketganman. Har kuni Zangiotaga boraman, buyam o‘zi bo‘lmayapti”, — deydi u.

Sadoiy tomonidan yozilgan she’rlar Nuriddin Haydarov, Bobomurod Hamdamov, G‘ulomjon Yoqubov, G‘iyos Boytoyev, Yulduz Usmonova, Ozodbek Nazarbekov, Ravshan Komilov kabi san’atkorlar tomonidan kuyga solinib, xit darajasiga chiqqan. Shoirning rafiqasi ularning aksariyatiga telefon qilgani, biroq “ular parvo ham qilmagani”ni aytgan.

“Shoir kasalligi to‘g‘risida hech kim so‘ramaydi, shuncha qo‘shiqlarini kuylagan san’atkorlar ham kelmaydi. Bir o‘zim qolib ketdim. Nechtasiga telefon qildim. Hammasi jim... Menga yordam bering, imkoningiz bo‘lsa. Bir-ikkita qo‘shiqchiga telefon qildim, ular parvo ham qilmadi. Mana-man deganiga ham telefon qildim, foydasi bo‘lmadi... U-bu tashkilotlarga ayting, iltimos, holidan xabar olishsin. Ozodbek aka (Nazarbekov)ga ham aytdim, gapirmadi u kishi”, — deb aytgan Iqbol Ergasheva intervyuda.

“Ishqilib, Xudo umrini bersin, juda qiynaldi, kasal bo‘lganiga qariyb bir oydan oshdi”, — deya qo‘shimcha qilgan shoirning rafiqasi.

Shamsiddin Sadoiy 1958-yilda Buxoro viloyatida tug‘ilgan. “Meni kutgan edingiz”, “Davlating borida”, “Dunyoni muhabbat oladi”, “Seni menga yaratgan” singari she’riy to‘plamlari nashr etilgan.