Sirdaryo viloyatining Sirdaryo tumanida joylashgan “P.M.G.” MCHJga qarashli AGTKSHDA 8-fevral kuni nazorat tadbiri o‘tkazilgan. Bu haqda “O‘zenergoinspeksiya” matbuot xizmati xabar berdi.
Mutaxassislar tomonidan AGTKSHning gaz hisoblagichini ko‘zdan kechirishga borilganda, shoxobchaning gaz hisoblagichi o‘rnatilgan xonadan nomaʼlum shaxs qo‘lida har xil kabellar bilan chiqib, qochib ketgan.
Shundan so‘ng gaz hisoblagich ko‘zdan kechirilganda hisoblagichning aloqa tarmog‘i (porti) uzilmaganligi kuzatilib, hisoblagichga tashqi taʼsir ko‘rsatilganligiga shubha qilinib, hisoblagich konfiguratsiyalarini tekshirtirish uchun yechib olinishi bildirilganda, AGTKSH rahbarlari tomonidan to‘sqinlik qilingan va hisoblagichni yechib olishga qarshilik ko‘rsatilgan.
Shu vaqtda Sirdaryo tumani IIB tezkor vakili kelib, “O‘zenergoinspeksiya” mutaxassisi A.N.ga tegishli avtomashinani ko‘zdan kechirib, shubhali ravishda nomaʼlum modda topib, voqea joyidan mutaxassisni olib ketgan.
Holat yuzasidan o‘tkazilgan tekshiruvlarga ko‘ra, (AGTKSHning videokameralarida qayd etilgan lavhalarga ko‘ra) bu voqea AGTKSHga tegishli shaxslar tomonidan qasddan uyushtirganligi aniqlandi.
Tadbir davomida jamiyatga qarashli gaz hisoblash uskunasini maʼlumotlar bazasiga tashqi taʼsir ko‘rsatilganligi aniqlandi.
Dastlabki hisob-kitoblariga asosan davlat manfaatlariga yetkazilgan zarar miqdori 5 mlrd 740 mln so‘mni (2,2 mln m3) tashkil etgan. Aniqlangan holat yuzasidan to‘plangan hujjatlar huquqiy baho berish uchun prokuraturaga yuborildi.
Qo‘shimcha qilinishicha, ushbu tadbirkorlik subyektida tabiiy gazdan noqonuniy foydalanish takroran sodir etilgan. Inspeksiya mutaxassisi tomonidan 2024-yilda mazkur AGTKSH rahbariga qarashli Sirdaryo viloyatida joylashgan ikkita AGTKSHda (“S.A.L.” va “M.G.” MCHJlar) tabiiy gazdan noqonuniy foydalanish holatlarini aniqlab, jami 28,3 mlrd so‘mlik zarar hisob-kitob qilingan.
Izoh (0)