Farg‘ona shahrida odamlar o‘limiga sababchi bo‘lgan zapravka boshqa faoliyat olib bormaydigan bo‘ldi. Bu haqda viloyat FVB matbuot xizmati xabar berdi.
Ma’lum qilinishicha, 22-dekabr kuni Farg‘ona shahar Ahmad Yassaviy ko‘chasidagi AYQSH va AGTSHni aholi va hududlarni favqulodda vaziyatlardan muhofaza qilish va kelgusida sodir bo‘lishi mumkin bo‘lgan favqulodda vaziyatlarning oldini olish maqsadida tadbirkorning o‘z xohishiga ko‘ra buzish ishlari boshlandi. Ushbu zapravka boshqa faoliyat olib bormaydi.
Farg‘onadagi portlash va yong‘in
Farg‘ona shahar, “Yangiyo‘l” MFY, Ahmad Yassaviy ko‘chasida joylashgan, ko‘p yonilg‘ili AYQSH va AGQSH shoxobchasida portlash va yong‘in 17-dekabr kuni sodir bo‘lgandi. Suyultirilgan gaz to‘kish vaqtida texnologik jarayonlarning buzilishi hamda texnika xavfsizligi qoidalariga rioya qilinmasligi oqibatida chaqnash sodir bo‘lgan, undan so‘ng yong‘in yuzaga kelgan.
Yong‘in oqibatida dastlab bir nafar fuqaro vafot etgani, to‘rt nafar fuqaro tan jarohati olgan, sakkiz nafar fuqaro tibbiyot xodimlari nazoratida ekani ma’lum qilindi. Keyinroq yana 3 kishi shifoxonada vafot etdi.
Holat yuzasidan Jinoyat kodeksining 257-moddasi (mehnatni muhofaza qilish qoidalarini buzish) 3-qismi “a” bandi hamda 259-moddasi (yong‘in xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, jinoyat ishi doirasida 5 kishi qamoqqa olindi.
Voqeadan so‘ng viloyat hududida faoliyat ko‘rsatayotgan barcha turdagi avtomobillarga yonilg‘i quyish shoxobchalarining belgilangan norma va me’yorlarga muvofiqligi holati o‘rganib chiqiladigan bo‘ldi. Baxtsiz va noxush hodisalarning oldini olish, xavfsizlik qoidalariga amal qilish, yo‘l qo‘yilgan kamchiliklarni bartaraf etish maqsadida “O‘zdavneftgazinspeksiya” Farg‘ona hududiy bo‘limi, viloyat favqulodda vaziyatlar boshqarmasi, “Hududgaz Farg‘ona” gaz ta’minoti filali kabi mas’ul tashkilotlar xodimlaridan iborat ishchi guruh tuzildi.
Izoh (0)