Kinematografiya agentligi elektr energiyasidan qarzdor bo‘lib qoldi. Bu maʼlumotni “Hududiy elektr tarmoqlari” AJ matbuot xizmati “Daryo”ga tasdiqladi.
Maʼlum qilinishicha, “O‘zbekfilm” kinokonserni DUKka tegishli “Renessans” korxonasi hududida qurilish ishlari olib borilgan va qurilish obyektida foydalanilgan elektr energiyasi uchun 2,7 mlrd so'mlik qarzdorlik vujudga kelgan.
Ushbu korxona qarzdorligi “O‘zbekfilm” kinokonserni DUK tomonidan qoplanishiga kelishilib, 10-fevral kuni tarmoqdan ajratilgan.
Avvalroq O‘zbekistonda 2025-yilning yanvar oyida qiymati 17 mlrd 411,3 mln so‘mlik “svet”dan noqonuniy foydalanilgani haqida xabar berilgandi.
5-yanvar kuni Qashqadaryoning ikki hududida qariyb 700 mln so‘mlik “svet”dan noqonuniy foydalanilgani haqida xabar berilgandi. 12-yanvar kuni esa Namangandagi sutni qayta ishlash sexida 2,1 mlrd so‘mlik “svet”dan noqonuniy foydalanilgani aytilgandi.
13-yanvarda esa Namangan va Andijonda qariyb 3 mlrd so‘mlik “svet”dan noqonuniy foydalanish holatlari aniqlangandi. 16-yanvarda Jizzax viloyatining Yangiobod, Toshkent viloyatining Zangiota, Qoraqalpog‘iston Respublikasining Beruniy va Toshkent shahrining Uchtepa tumanida energiya resurslaridan noqonuniy foydalanish holatlari fosh etilgan edi.
Izoh (0)