“Boshqotirma” animatsion filmining ikkinchi qismi chiqishi bilanoq qisqa fursatda barcha rekordlarni yangilab, eng kassabop multfilmga aylandi va 1,5 milliard dollardan ortiq daromad keltirdi. Quyida barcha davrlarning eng daromadli 12 ta filmini jamladik. Ushbu reytingda “Boshqotirma-2” filmi nechanchi o‘rinni egallaganini materialda bilib olamiz.
1-o‘rin: “Avatar”
Shu kungacha “Avatar”ning birinchi qismi 2,9 milliard dollar daromad olib kelgan. Film XXI asr boshida yaratilgan eng yuqori daromadli kartinalardan biri sifatida abadiy qoldi. Darvoqe, rejissyor o‘z ishiga puxta yondashadigan inson bo‘lmaganida edi, film 2009-yilda emas, balki 1999-yilda namoyish etilishi mumkin edi. Ammo texnologiyalarning rivojlanish darajasi o‘sha davrga mos kelmagan va shuning uchun tomoshabinlar filmni faqat o‘n yildan keyin ko‘rishga muvaffaq bo‘lgan.
2-o‘rin: “Qasoskorlar: xotima”
Marvel kino olamining mahsuli ushbu reytingda yetakchi o‘rinni egallamoqda. Filmning kassa tushumlari 2,7 milliard dollardan oshgan bo‘lib, loyiha super qahramonlar kinematografiya olami bilan bir necha bor hamkorlik qilgan aka-uka Russolarga tegishli. Filmning birinchi rasmiy treyleri YouTube kanalida tarixda birinchi marta 4 soatdan kamroq vaqt ichida milliondan ortiq layk to‘plagan.
3-o‘rin: “Avatar: suv yo‘li”
O‘z davrida eng ko‘p daromad keltirgan top-3 ta filmlarning ikkitasi mahoratli rejissyor Jeyms Kemeronga tegishli. Filmning kassa tushumlari: 2,3 milliard dollarga yetgan. “Avatar-2” filmining tijoriy muvaffaqiyati Kemeronni franshizani davom ettirishi kerakligiga ishontirdi. Filmning uchinchi qismini suratga olish ishlari allaqachon yakunlangan, to‘rtinchi va beshinchi qismlari uchun ssenariylar tayyor.
4-o‘rin: “Titanik”
“Titanik” filmi kassa tushumi milliard dollardan oshgan birinchi film bo‘ldi va “Avatar” undan o‘zib ketguniga qadar 12 yil davomida tarixdagi eng yuqori daromad keltirgan film nomini saqlab qoldi. Daho rejissyor Jeyms Kemeronning ushbu filmi 2,2 milliard dollar daromad keltirgan.
5-o‘rin: “Yulduzlar jangi: qudrat uyg‘onishi”
Rejissyor Jey Jey Abrams tomonidan suratga olingan Walt Disney kompaniyasiga tegishli “Yulduzlar jangi: qudrat uyg‘onishi” filmi dunyo bo‘yicha yig‘imlari 2,07 milliard dollarni tashkil qildi. Mazkur loyiha 2015-yilda namoyish etilgan va ko‘plab shov-shuvlarga sabab bo‘lgan. “Yulduzlar jangi”ning yettinchi epizodi namoyishi oldidan AQSh va Kanada davlatlari chipta sotishdan rekord darajada foyda ko‘rgan.
6-o‘rin: “Qasoskorlar: abadiyat jangi”
Ushbu fantastik jangari film 2018-yilda aka-uka rejissyor Russolar tomonidan suratga olingan va film 2,052 milliard dollardan ko‘proq daromad ko‘rgan.
7-o‘rin: “O‘rgimchak odam: uyga yo‘l yo‘q”
Pandemiya davrida suratga olingan ushbu film tufayli aktyor Tom Holland MTV Movie&TV Awards 2022 marosimida “eng yaxshi aktyor” nominatsiyasida g‘olib bo‘lgan. Loyiha 1,9 milliard dollar daromad keltirgan.
8-o‘rin: “Yura davri dunyosi”
Resjissyor Kolin Trevorrouga tegishli “Yura davri dunyosi” filmi eng daromadli kino loyihalar reytingida faxrli 8-o‘rinni egalladi. Uning kassa tushumlari 1,67 milliard dollarni tashkil etgan.
9-o‘rin: “Qirol sher”
2019-yilda chiqqan film Amerika kinofilmlar assotsiatsiyasi tizimidagi PG reytingiga loyiq ko‘rildi va 1,666 million dollar bilan boshqa loyihalarni ortda qoldirdi. Unda Mufasadan keyin qirol bo‘ladigan sher bolasi Simba haqida hikoya qilinadi.
10-o‘rin: “Qasoskorlar”
Variety reytingiga ko‘ra, XXI asrning eng ko‘p daromad keltirgan filmlari o‘ntaligiga 1,52 milliard dollar to‘plagan “Qasoskorlar” ning birinchi qismi kiradi. Ushbu film Marvel olami muxlislari orasida hit bo‘ldi. Dunyoni qutqarishga tayyor bo‘lgan jasur superqahramonlar, maxsus effektlar, ajoyib kamera ishi va yulduzli aktyorlar tarkibi — bularning barchasi loyiha xarajatlarini bir necha marta qoplashga muvaffaq bo‘ldi. Film darhol tanqidchilar va tomoshabinlar tomonidan yuqori baholandi.
11-o‘rin: “Forsaj-7”
Aktyor Vin Dizel va Mishel Rodriges ishtirokidagi film hech kimni befarq qoldirmadi, shuning uchun loyiha 1,52 milliard dollar olib keldi. Unda marhum aktyor Pol Uoker so‘nggi marta rol ijro etgan.
12-o‘rin: “Boshqotirma-2”
Taxmin qilganingizdek, “Boshqotirma-2” kuchli 12 talikni egalladi. Filmning premyerasi shov-shuvli tarzda o‘tdi va loyiha tarixdagi eng daromadli filmlar ro‘yxatiga kira oldi. Faxrli 12-o‘rinni olgan mazkur loyiha daromadi 1,5 milliard dollarni tashkil etdi.
Izoh (0)