Shri Lankadagi elektr podstansiyasiga kirib qolgan maymun 9-fevral kuni butun mamlakat bo‘ylab elektr ta’minotida uzilishga olib keldi. Bu haqda The Economic Times xabar berdi.
Blekaut mahalliy vaqt bilan soat 11:30 da boshlangan va asta-sekin ayrim hududlarda tiklangan. Maymun ishtirokidagi hodisa Kolombo janubidagi shahar chekkasida sodir bo‘lgan.
“Maymun bizning elektr tarmog‘imizdagi transformatorga tegib, tizimda muvozanat buzilishiga sabab bo‘ldi”, deydi energetika vaziri Kumara Jayakodi.
Ba’zi hududlarda elektr ta’minoti tiklangan bo‘lsa-da, hokimiyat elektr energiyasini to‘liq tiklash uchun qancha vaqt ketishini bilmaydi.
“Muhandislar xizmatni imkon qadar tezroq tiklash uchun muammoni bartaraf etish ustida ishlashmoqda. Noqulayliklar uchun uzr so‘raymiz va sabr-toqatingiz uchun tashakkur bildiramiz”, dedi vazir.
2022-yilda Shri Lankadagi iqtisodiy inqiroz davrida uzoq muddatli elektr energiyasi tanqisligi kuzatilgan. O‘shanda yonilg‘i tanqisligi elektr stansiyalarining kuniga 13 soatgacha uzilishiga sabab bo‘lgandi.
Izoh (0)