Ukrainada blekaut chog‘ida ishlaydigan banklar tarmog‘i yaratildi

Ukrainaning eng yirik banklari bir tarmoqqa birlashdi, u elektr energiyasi o‘chirilgan vaqtlarda mijozlarga xizmatlar ko‘rsatadi. Bu haqda Ukraina Milliy banki xabar bermoqda.

Tarmoqqa mamlakatdagi 14 ta eng yirik bankning mingdan ortiq bo‘linmalari kirdi, ular energiyaning zaxira manbalari va muqobil aloqa kanallari, shuningdek, qo‘shimcha naqd pul zaxiralari bilan ta’minlangan.

Ushbu qaror Ukraina hukumatining infratuzilmaga hujumlar sharoitida o‘ta muhim servislar faoliyatining uzluksizligini ta’minlash bo‘yicha umumiy loyihasi doirasida amalga oshirilmoqda. Bo‘linmalarda naqd pul olish, valyuta ayirboshlash, kommunal xizmatlar uchun to‘lash va mutaxassislardan maslahat olish mumkin bo‘ladi.

Rossiya sentabrdan buyon Ukraina energetika infratuzilmasiga muntazam hujumlar uyushtirib kelmoqda. O‘qqa tutishlar natijasida Kiyev, Xarkov, Lvov, Odessa kabi butun bir yirik shaharlar issiqlik va elektr ta’minotidan uzilib qolmoqda.