O‘zbekiston energotizimida og‘ir oqibatli “avariya” – blekaut xavfi borligi ma’lum qilindi

Ijtimoiy tarmoqlarda Energetika vazirligi huzuridagi “Milliy dispetcherlik markazi” DUK direktori Muzaffar Boboyevning hududiy elektr tarmoqlari korxonalari rahbarlari, “Hududiy elektr tarmoqlari” kompaniyasi boshqaruv raisi, Energetika vazirligi hamda “O‘zenergoinspeksiya”ga yuborgan blekautdan ogohlantirish xati tarqaldi. “Gazeta.uz” xabarida keltirilishicha, Energetika vazirligi matbuot xizmati ushbu xatning haqiqiyligini tasdiqlagan.

Xatda yozilishicha, 2022-yil 9-noyabrdan boshlab energetika tizimi issiqlik elektr stansiyalari (IES) yoqilg‘i ta’minoti bilan bog‘liq og‘ir holat vujudga kelgan. 12-noyabr kuni elektr stansiyalarga kelishilgan jadvalga nisbatan jami soatiga 350 ming metr kub, shu jumladan, Toshkent IESga rejadan soatiga 270 ming metr kub kam gaz yetkazib berilgan. Toshkent IESga 50 ming metr kub tabiiy gaz yetkazilib, stansiyada energobloklar texnologik parametrlari me’yor ko‘rsatkichlaridan tushishi va uskunalarning shikashtlanishini oldini olish maqsadida 1-son BGQ (360 MVt) va ikki dona energobloklar to‘xtatilgan.

Stansiyada umumiy elektr energiyasi ishlab chiqarilishi mazut yoqilg‘isi yoqish hisobiga 500 MVt gacha (belgilangan rejaga nisbatan 600 MVt kam) tushib ketdi. Elektr energiyasi balansini ta’minlash va energetika tizimida og‘ir oqibatli yirik favqulodda avariya holatlari yuzaga kelishining oldini olish maqsadida hamda tuman elektr ta’minoti korxonalari tomonidan 6,10 kV tarmoqlardan kiritilayotgan cheklovlar samarasizligi sababli “Milliy dispetcherlik markazi” DUK tomonidan maxsus jadvalga asosan yuqori kuchlanishli tarmoqlardan o‘chirilib, elektr energiyasi iste’moli kamaytirildi.

Yuzaga kelgan favqulodda vaziyat sabab tizimda og‘ir oqibatli avariya holatlarini (blekaut) oldini olish hamda iste’molchilar ta’minotida tartibsiz uzilishlarni bartaraf etish maqsadida sizdan 12-noyabr sanasidan boshlab, alohida topshiriq bo‘lgunga qadar “Milliy dispetcherlik markazi” DUK tomonidan berilayotgan soatlik elektr energiyasi iste’moli topshirig‘ini qat’iy ravishda bajarishingiz so‘raladi.

“Milliy dispetcherlik markazi”ning mintaqaviy va hududiy bo‘linmalari tomonidan elektr talab qilingan qiymatlarga tushirish bo‘yicha berilgan topshiriqlarni bajarmaslik O‘zbekiston energotizimining aybi bilan Markaziy Osiyo yagona elektr energetikasi tizimida yirik oqibatli avariyalarga sabab bo‘lishi mumkin”, – deyiladi markaz direktori xatida.

Avvalroq Energetika vazirligi elektr va gaz ta’minotidagi muammolarni to‘g‘ri tushunishga chaqirgani xabar qilingandi. Shuningdek, Angren IES energoblokida nosozlik yuzaga kelgani bildirilgan.