Isroil milliy xavfsizlik vaziri Itamar Ben-Gvir HAMAS tomonidan garovga olingan olti nafar isroillikning o‘ldirilishi munosabati bilan G‘azodagi vaziyatni tartibga solish bo‘yicha muzokaralarni to‘xtatishga harakat qilayotganini ma’lum qildi.
![](/static/2024/09/04/photo_2024-09-04_16-39-17-1T0cKcLy.jpg)
“Men HAMAS bilan muzokaralarni to‘xtatishga harakat qilyapman. Olti nafar fuqarosi garovga olingan holda o‘ldirilgan davlat qotillar bilan muzokaralar olib bormaydi, balki muzokaralarni to‘xtatadi, ularga yoqilg‘i va elektr energiyasi yetkazib berishni to‘xtatadi, taslim bo‘lmaguncha ularni ezadi. Muzokaralarning davom etishi ularni tobora ko‘proq terror yaratishga undaydi, dedi vazir X sahifasida.
Bayonot G‘azo sektorida o‘g‘irlab ketilgan olti isroillikning o‘ldirilishi haqidagi xabardan bir necha kun o‘tib e’lon qilindi.
Isroil milliy xavfsizlik vaziri G‘azo bo‘yicha muzokaralar va kelishuvlarga doimiy ravishda qarshi chiqqan. Uning fikricha, ular Isroilning hozirgi urushda g‘alaba qozonishiga hissa qo‘shmaydi. Mamlakat rahbariyati tomonidan qo‘yilgan urush maqsadlari esa barcha garovga olinganlarni ozod qilish bilan birga, HAMASning harbiy va siyosiy salohiyatini to‘liq yo‘q qilishni nazarda tutadi.
G‘azo bo‘yicha vositachilar orqali muzokaralar bir necha haftadan buyon Qohira va Dohada olib borilmoqda, biroq aniq muvaffaqiyat haqida xabar berilmagan. Isroilning G‘azo va Misr o‘rtasidagi chegarada nazoratni saqlab qolish talabi Falastin anklavidagi vaziyatni tartibga solish bo‘yicha kelishuvga erishish yo‘lidagi to‘siqlardan biridir. Isroil rasmiylari mamlakat armiyasi chiqib ketgan taqdirda, HAMAS qayta qurollanib, jangovar salohiyatining bir qismini tiklay olishiga ishonch bildirgan.
Izoh (0)