Isroil bilan harbiy keskinlik boshlanganidan beri G‘azo sektorida ishsizlik darajasi 80 foizga yetgan. Bu haqda Xalqaro mehnat tashkiloti (XMT) eʼlon qilgan bayonotga asoslanib, Al Jazeera nashri xabar berdi.
Xalqaro mehnat tashkiloti ishsizlik darajasini rasman 79,1 foiz etib belgilagan. G‘azodagi aholini mehnat faoliyati va daromad bilan taʼminlab turgan muassasalarning 90 foizi vayron qilingani xabar qilingan.
Hisobotda, shuningdek, okkupatsiya qilingan G‘arbiy Sohildagi ishsizlik darajasiga ham o‘rin berilgan. Unda aytilishicha, G‘arbiy Sohilning bosib olingan hududlarida ishsizlik darajasi qariyb 32 foizni tashkil etgan. Falastinning Isroil nazorati ostida qolib ketgan hududlaridagi umumiy o‘rtacha ishsizlik darajasi 50,8 foiz deb belgilangan.
Urush boshlanganidan beri real yalpi ichki mahsulot Falastin hududida qariyb 33 foizga qisqargan. G‘azo sektorida esa ishlab chiqarishning qariyb 83,5 foizi yo‘qotilgan.
Bosib olingan Falastin hududida va, xususan, G‘arbiy Sohilda daromadlarning qisqarishi ko‘plab oilalarni og‘ir qashshoqlikka olib keldi, — degan Xalqaro mehnat tashkilotining arab mamlakatlari bo‘yicha mahalliy direktori Ruba Jaradat.
Falastin Sog‘liqni saqlash vazirligi rasmiylariga ko‘ra, urush boshlanganidan beri Isroilning G‘azoga hujumlari oqibatida kamida 36 654 kishi halok bo‘lgan. 83 309 kishi jarohat olgan. Yana minglab odamlar vayronalar ostida bedarak yo‘qolgani xabar qilingan.
Izoh (0)