O‘zbekiston jurnalistika va ommaviy kommunikatsiyalar universiteti rektori, jurnalist Sherzodxon Qudratxo‘jani kamsitgan bloger jarimaga tortildi. Bu haqda “Daryo”ga Toshkent shahar sudlari axborot xizmati maʼlum qildi.
Bloger va huquqshunos Aziz Hakimovning rektorni kamsitgani bilan bog‘liq voqea 12-avgust kuni Jinoyat ishlari bo‘yicha Uchtepa tuman sudida ko‘rib chiqildi. Sudya Sodiqov raisligidagi sudda so‘z olgan sudlanuvchi Sherzodxon Qudratxo‘jani omma oldida haqorat qilgani va uni natsizmda ayblaganini maʼlum qilgan.
Sud blogerni Maʼmuriy javobgarlik to‘g‘risidagi kodeksning 202-2-moddasi 1-qismi (Shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish, shu jumladan ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish) bilan aybli deb topgan. Sudlanuvchi bazaviy hisoblash miqdorining 50 baravari 18 million 750 ming so‘m miqdorida jarimaga tortilgan.
Qayd etilishicha, Sherzodxon Qudratxo‘ja mazkur ishni jinoiy toifaga o‘zgartirishni talab qilish niyatida ekanini qo‘shimcha qilgan.
Shuningdek, u sudlanuvchidan 500 million so‘m tovon undirish niyati borligini, omma oldida kechirim so‘rashi va o‘zi tilga olingan barcha videolarni olib tashlashini talab qilgan. Sud Qudratxo‘janing bu talablari Fuqarolik ishlari bo‘yicha sudda ko‘rib chiqilishi kerakligini bildirib, sudga murojaat qilish kerakligini tushuntirgan.
Izoh (0)