“G‘azodagi mojaroning ishtirokchilari uning tugashini istamayapti” — Josep Borrel

Yevropa Ittifoqi diplomatiyasi rahbari Josep Borrelning aytishicha, G‘azo sektoridagi janglar ishtirokchilari mojaroga barham berishdan manfaatdor emas, shu bois sulh bo‘yicha kelishib bo‘lmayapti.

“Biz o‘t ochishni to‘xtatish bo‘yicha kelishuvga erishishga vositachilik qilayotgan Misr, Qatar va Qo‘shma Shtatlarni har tomonlama qo‘llab-quvvatlaymiz. Biz maqsadga juda yaqin keldik, lekin unga hali erishmadik”, dedi Borrel.

“Nima uchun? Javobi oddiy: urush olib borayotganlar uni tugatishdan manfaatdor emas. Ular borgan sari buni ochiq namoyon qilishmoqda, chunki bu harakatlari uchun javobgarlikka tortilmasliklarini bilishadi”, deb davom etdi u.

Borrelning so‘zlariga ko‘ra, “xalqaro huquqning ochiqdan ochiq buzilishiga eʼtibor berilmayapti”. 

Borrel “ikki xalq uchun ikki davlat” tamoyilini hayotga tatbiq etishga tayyor bo‘lganlar bilan ishlash zarurligini tushuntirdi.