SSSR parchalanib ketgandan so‘ng Rossiyada juda ko‘plab taniqli shaxslar o‘ldirib ketildi yoki sirli ravishda halok bo‘ldi. Bu holat Putin hokimiyat tepasiga kelgandan so‘ng ko‘paydi. O‘ldirilganlarning aksariyati Rossiya rahbari va hukumatiga muxolif bo‘lgan yoki uni ashaddiy tanqidchisiga aylangan. Qo‘yida keskin tanqidlari uchun o‘ldirilgan yoki shubhali tarzda vafot etgan taniqli shaxslar haqida so‘z yuritamiz.
XXI-asrda Rossiyada juda ko‘p shaxslar shubhali tarzda vafot etdi yoki suiqasd qurboni bo‘ldi. Ular orasida turli lavozimdagi shaxslar bilan birga Rossiya hukumati va rahbarini doimiy ravishda tanqid qilib kelgan shaxslar ham bor.
Shubhali tarzda vafot etgan yoki o‘ldirilgan shaxslarning ba’zilari siyosatchi, ba’zilari jurnalistlar bo‘lgan. Ular orasida milliarder yoki FSB sobiq xodimlari ham bor.
Bu shaxslarning aksariyati Rossiyada, ayrimlari esa xorijda o‘ldirilgan. Tanqidchilar qotilliklarni Rossiya maxfiy xizmat idorasi bilan bog‘lashadi. Biroq FSB ularda ishtirok etganini rad etadi.
Ushbu materialda Rossiya rahbariyati va hukumatini turli ishlarda ayblagan shaxslarning qanday tarzda o‘ldirilgani yoki shubhali halok bo‘lganini eslab o‘tamiz.
Boris Nemtsov (2015-yilda o‘ldirilgan)
Boris Nemtsov katta siyosatga “umidli yosh kadr” sifatida 1990-yillarda Rossiyani Boris Yelsin boshqarib yurgan paytlarda kirib kelgan.
Avvaliga xalq deputati bo‘lib saylangan Nemtsov 1991-yilda Rossiya prezidentining Nijegorod viloyati bo‘yicha vakili bo‘ladi. Shu bilan birga u 1991-1997-yillar oralig‘ida Nijegorod viloyati gubernatori vazifasini bajaradi.
1997-yilda Nemtsov yetti oy mobaynida Rossiya yoqilg‘i va energetika vaziri bo‘lgan. O‘sha yili mart oyida u Rossiya hukumati raisining birinchi o‘rinbosari bo‘ladi va bu vazifada bir oy ishlaydi. So‘ng hukumat raisining oddiy o‘rinbosari bo‘ladi.
O‘sha paytda ko‘pchilik 38 yoshda bo‘lgan siyosatchini Boris Yelsindan keyin Rossiya rahbari bo‘lishga asosiy da’vogar deb hisoblardi. Biroq vaziyat boshqacha kechadi va 2000-yilda Rossiya “taxtiga” sobiq KGBchi, Rossiya federal xavfsizlik xizmati rahbari Vladimir Putin keladi.
Shundan so‘ng Boris Nemtsov muxolifat tomonga o‘tadi va Putinning ashaddiy tanqidchisiga aylanadi. U uzoq yillar davomida Rossiya prezidentining ashaddiy tanqidchisi bo‘lib keladi.
Bundan tashqari, Nemtsov ko‘p marta Rossiya prezidentiga qarshi namoyishlar, mitinglar o‘tkazdi va omma oldida Putinga nisbatan haqoratli so‘zlar ishlatdi.
2014-yilda Rossiya Ukraina sharqiga o‘z harbiylarini kiritganda va Qrimni o‘ziga qo‘shib olganda Nemtsov buni tanqid qilib chiqadi.
2015-yil 27-fevral kuni Moskvadagi ko‘priklardan birining ustida noma’lum shaxslar siyosatchiga qarata oltita o‘q uzishadi. Oqibatda og‘ir tan jarohatlari olgan Nemtsov hodisa joyida halok bo‘ladi.
O‘shanda FSB rahbari Aleksandr Bortnikov Nemtsovni o‘ldirganlikda gumonlanib ikki shaxs – Anzor Gubashev va Zaur Dadayev qo‘lga olinganini ma’lum qiladi. Keyinchalik siyosatchining o‘limida yana bir necha nafar shaxs ayblanadi.
Asosiy ayblanuvchi, Rossiyaning Shimoliy Kavkazdagi harbiy bo‘linmasi komandiri bo‘lgan Zaur Dadayev qo‘lga olinadi. Tergovda u Nemtsovni Islom dinini tanqid qilgani uchun o‘ldirganini aytadi.
Biroq Rossiyalik aksariyat muxolifatchilar, xorijlik ekspertlar Nemtsov aynan Putinning ashaddiy tanqidchisi bo‘lgani uchun o‘ldirilganini aytishadi.
Bir necha yillardan buyon Nemtsov o‘ldirilgan joy Rosgvardiya va politsiya xodimlari tomonidan qo‘riqlanadi va u yerga gul qo‘ymoqchi bo‘lganlar ko‘prikka yaqinlashtirilmaydi.
Boris Berezovskiy (2013-yilda vafot etgan)
Boris Berezovskiy o‘z davrida Rossiyaning birinchi prezidenti Boris Yelsinga yaqin odamlardan biri bo‘lgan va 1990-yillarda o‘tkazilgan xususiylashtirish jarayonlarida juda katta mulkka va pulga ega bo‘lib, milliarderga aylangan.
U 1990-yillar oxirlarida vaqtinchalik Rossiya rahbari bo‘lgan Putin bilan yaqinlashishga urinadi. Hatto 2000-yil 8-may kuni Putinning inaguratsiyasida qatnashadi.
Biroq Rossiyaning yangi prezidentidan o‘zi kutgan javobni ololmagach uning tanqidchisiga aylanadi. Oradan ko‘p o‘tmay 2000-yil noyabrda u Britaniyaga qochib ketadi. Shundan so‘ng uning Rossiyadagi aktivlari musodara qilinadi.
Oligarx Britaniyada ham tinch yurmaydi va Rossiya rahbarini tanqid qilishda davom etadi. U Britaniyada yashab yurgan kezlarida bir necha marta o‘zini noma’lum shaxslar kuzatayotganini va bir marta joniga qasd qilishga urinishganini aytgan.
2013-yil 23-mart kuni Berezovskiy Londondan 40 km uzoqlikda joylashgan uyidan jonsiz holda topiladi. O‘shanda u 67 yoshda edi. Milliarderning jasadini birinchi bo‘lib tansoqchisi ko‘rib qoladi.
Avvaliga Berezovskiy o‘z joniga qasd qilgani aytiladi. Keyinroq esa oligarx joniga qasd qilmagani va uni o‘ldirishgani haqida gap-so‘zlar tarqaydi.
Keyinchalik uning o‘limi bo‘yicha mustaqil tekshiruv olib borgan bir necha taniqli mutaxassislar Berezovskiy o‘z joniga qasd qilmaganini, bunga asos ham bo‘lmaganini, u o‘ldirilganini aytib chiqishgan. Rossiya muxolifati Berezovskiy FSB agentlari tomonidan ustalik bilan o‘ldirilganini aytishgan.
Stanislav Markelov va Anastasiya Baburova
Stanislav Markelov va Anastasiya Baburovani bekorga bitta raqam ostida keltirmadik, sababi qotil ularni birga ketayotganda hujum qilgan va o‘ldirgan.
2000-yillar boshlarida Stanislav Markelov Rossiyadagi taniqli advokat edi. O‘sha paytlarda u asosan Putinni tanqid qilib maqola yozgan jurnalistlar turli sabablar bilan mahkamalarga tortilganda ularni himoyasi bilan shug‘ullanardi.
Jumladan, 2006-yilda o‘ldirilgan va Putin va uning Chechenistondagi harbiy harakatlari tanqidchisi bo‘lgan Anna Politkovskayani ko‘p marta himoya qilgan.
Bundan tashqari, Markelov Polkovnik Yuriy Budanov tomonidan zo‘rlab o‘ldirilgan chechen qizi Elza Kungayeva ishida ham Elzaning qarindoshlariga advokatlik bo‘lgan.
Anastasiya Baburova ham jurnalist, siyosatchi va inson huquqlarini himoya qilish faoli bo‘lgan va asosan Markelov bilan hamkorlikda ishlagan.
2009-yil 19-yanvar kuni Stanislav va Anastasiya Kreml yaqinidagi ko‘chaning piyodalar yo‘lakchasidan ketishayotganda noma’lum shaxs hujum qiladi. U avval Stanislavga, so‘ng Anastasiyaga to‘pponchadan o‘q uzadi. Oqibatda Stanislav hodisa joyida, qiz esa kasalxonada vafot etadi.
Ko‘p o‘tmay Rossiya prokuraturasi Moskvada yashovchi er-xotin Nikita Tixonov va Yevgeniya Xasisni qotillikda ayblaydi va ularni qo‘lga oladi. Ikki yil davom etgan tergovdan so‘ng Nikita umrbod, Yevgeniya esa 18 yil qamoq jazosi oladi.
Ma’lum bo‘lishicha, er-xotin rus millatchilari tomonidan tashkil etilgan noqonuniy tashkilot safida bo‘lishgan. Ularga Stanislav va Anastasiyaning millatchilarga qarshi bo‘lgani, shuningdek chechenlarni tarafini olib kelgani yoqmagan.
Garchi aybdorlar topilib, ular jazosini olgan bo‘lsa-da, Rossiya muxolifati Stalislav Markelov Anastasiya Baburovani FSB yo‘q qilgan deb hisoblaydi. Bunga sabab esa ular Putinni doimo tanqid qilib kelishgani bo‘lgan.
Sergey Magnitsikiy (2009-yilda o‘ldirilgan)
Sergey Magnitskiy amerikalik advokat Jeyms Fayerstoun tomonidan tashkil etilgan Firestone Duncan xususiy konsalting kompaniyasida yuqori lavozimda ishlardi.
O‘sha paytlarda Rossiyadagi yirik fondlardan biri Hermitage Capital Management ham Firestone Duncan’ning mijozi edi. 2006-yil oxirida kutilmaganda Hermitage Capital Management rahbari Uilyam Brauder fond Rossiyada o‘z faoliyatini to‘xtatishi va aktivlarni sotishini e’lon qiladi.
Bu qaror ko‘pchilikni hayron qoldiradi. Chunki fond 2006-yilda qariyb yarim mlrd dollar daromad qilgan, Rossiya byudjetiga 230 mln dollar soliq to‘lagandi.
2007-yilga kelib ish ancha kattalashadi va politsiya avvaliga Hermitage Capital Management ofisida, so‘ng unga xizmat ko‘rsatib kelayotgan Firestone Duncan konsalting firmasida tintuv o‘tkaziladi. Politsiya xodimlari bu yerdan fondga tegishli barcha hujjatlarni olib ketishadi.
Tabiiyki Firestone Duncan o‘z mijozi bo‘lgan fond atrofida sodir bo‘layotgan ishlar bo‘yicha surishtiruv o‘tkaza boshlaydi. Surishtiruvlarda Sergey Magnitskiy fond tarkibidagi kompaniyalar soliq organlari rahbarlari va Rossiya IIV yuqori martabali muloimlari bilan til biriktirib, 200 mln dollarni o‘zlashtirganini aniqlaydi. Shundan so‘ng uning boshida qora bulutlar aylana boshlaydi.
2008-yil 24-noyabr kuni Sergey Magnitskiy Hermitage Capital Management fondi rahbari Uilyam Brauderga soliqlardan qochishda yordam berganlikda ayblanib, Moskva shahar IIB soliq jinoyatlariga qarshi kurash boshqarmasi xodimlari tomonidan qo‘lga olinadi.
11 oy davom etgan tergovdan so‘ng 2009-yil 16-noyabr kuni Magnitskiy Moskvadagi tergov hibsxonasida shubhali tarzda vafot etadi. O‘sha yili 30-noyabr kuni unga nisbatan ochilgan jinoyat ishi vafoti munosabati bilan harakatdan to‘xtatiladi.
Magnitskiy vafot etganidan so‘ng hibsxona ma’muriyati avvaliga u pankreonekrozdan vafot etganini so‘ng o‘tkir yurak yetishmovchiligidan vafot etganini aytib chiqadi.
Magnitskiyning advokatlari esa u hibsdaligida qiynoqqa solingani va oqibatda turli tan jarohatlari olgani va o‘z vaqtida tibbiy muolaja ko‘rsatilmagani uchun vafot etganini aytishgan.
Keyinchalik, Magnitskiy Putinning tanqidchisi bo‘lgani uchun soxta ayblovlar bilan jinoyat ishi qo‘zg‘atilgani va u qamoqxonada qasddan o‘ldirib yuborilgani haqida gap-so‘zlar chiqadi.
Magnitskiyning o‘limi nafaqat Rossiyada, balki G‘arbda juda katta shov-shuv keltirib chiqaradi. Inson huquqlarini himoya qilish faollari aybdorlarni topib jazolashni talab qilishadi.
Biroq Rossiyada Magnitskiyning o‘limi yuzasidan biror kishi jiddiy jazo olmaydi. Shundan so‘ng AQSHda “Magnitskiy qonuni” ishlab chiqiladi. Bu qonunda nafaqat Magnitskiyning o‘limi bo‘yicha aybdorlarga, shuningdek, korrupsion ishlarga aralashgan yoki inson huquqlari buzilishiga sababchi bo‘lgan shaxslarga ham sanksiyalar joriy qilish nazarda tutilgan.
Natalya Estemirova (2009 yilda o‘ldirilgan)
Natalya Estemirova Rossiyadagi inson huquqlari himoyasi bo‘yicha taniqli insonlardan biri edi. U o‘z maslakdoshlari bilan asosan Putin hokimiyat tepasiga kelgandan so‘ng bo‘lib o‘tgan Ikkinchi chechen urushi davrida rossiyalik harbiylar tomonidan tinch aholining qirib yuborilgani bo‘yicha tekshiruvlar o‘tkazgan.
Bu jasur ayol o‘z surishtiruvlari va haqiqatlarni yuzaga chiqargani uchun xalqaro tashkilotlar tomonidan bir necha marta nufuzli mukofotlarni qo‘lga kiritgan. Hatto 2007 yilda Nobel mukofotining ayollar bo‘limi uni Anna Politkovskaya nomidagi mukofotga loyiq ko‘rgan.
Natalyaning Rossiya armiyasi Chechenistonda o‘tkazgan ommaviy qirg‘inlar o‘tkazgani haqidagi surishtiruvlari va ular asosida yozgan materiallari Rossiya amaldorlariga yoqmasdi. Ayolga ko‘p marta anonim tahdidlar bo‘lgan. Bu u FSB xodimlari amalga oshirgan deb hisoblardi.
2009-yil 15-iyul kuni ertalab noma’lum shaxslar Natalyani Grozniydagi uyidan olib chiqib ketishadi. O‘sha kuni tushdan so‘ng ayolning jasadi Ingushetidan, katta yo‘l yoqasidan topiladi. Natalyaning boshi va ko‘kragiga uzilgan ikki tufayli jon bergandi.
Rossiya muxolifatiga ko‘ra Putin va uning Chechenistonda olib borgan urushini tinimsiz tanqid qilib kelgan ayolni FSB xodimlari o‘ldirgan. Biroq hukumat buni tan olmaydi va otasi chechen, onasi rus bo‘lgan Natalyani chechen jangarilari o‘ldirganini aytib chiqadi. Shu tariqa, Rossiyada Natalyaning o‘limi uchun hech kim jazolanmaydi.
Anna Politkovskaya (2006 yilda o‘ldirilgan)
Anna Politkovskayaning kasbi jurnalist bo‘lgan va u “Novaya gazeta”ning muxbiri sifatida ishlagan. Ayol jurnalistikadan tashqari, inson huquqlari himoyasi bilan ham shug‘ullangan. Tom ma’noda u Natalya Estemirova kabilar bilan hamkorlikda ishlagan.
Rossiya armiyasi Ikkinchi chechen urushini o‘tkazgach, Annaga Chechenistondan juda ko‘p murojaatlar tushadi. Ularning aksariyatida murojaatchilar Rossiya armiyasi Chechenistonda tinch aholi vakillarini qirg‘in qilgani, ayollarni zo‘rlagani haqida xabar bergandi.
Shundan so‘ng Anna ko‘p vaqtini Chechenistonda o‘tkazadi va uzoq ovullargacha borib, Rossiya armiyasi sodir etgan qirg‘inlarga guvoh bo‘lganlar bilan gaplashadi. O‘zi yiqqan ma’lumotlar asosida maqolalar yozib, “Novaya gazeta” nashrida chop ettiradi.
Shuningdek, Anna Chechenistonda ko‘rgan-kechirganlari, yiqqan ma’lumotlari asosida bir nechta hujjatli kitoblar yozadi. “Do‘zaxga sayohat. Chechen kundaligi”, “Ikkinchi chechen urushi”, Checheniston: Rossiyaning isnodi”, “Jinoiy to‘da kelishuvi”, “Dom-daraksiz yo‘qolgan odamlar” shular jumlasidan.
Bundan tashqari, Putinning ashaddiy tanqidchisi sifatida Anna “Putin Rossiyasi” va “Putinsiz Rossiya” kitoblarini yozgan.
Anna Chechenistonda surishtiruv o‘tkazib yurgan paytlarida ko‘p marta noqonuniy hibsga olingan va bir necha kundan so‘ng qo‘yib yuborilgan.
2006-yil 7-oktyabr kuni Moskvadagi ko‘p qavatli uylardan birining liftida ayol kishining jasadi topiladi. Ayol pistoletdan otilgan to‘rtta o‘q yordamida o‘ldirilgandi. Tekshiruvlarda jasad Anna Politkovskayaga tegishli ekani aniqlanadi. Ayol aynan Putinning tug‘ilgan kunida o‘ldirilgan edi.
Oradan ikki yil o‘tgach Rossiya prokuraturasi Annani Britaniyada qochib yurgan Berezovskiyning buyurtmasi bilan chechen jinoiy avtoriteti Hoji-Ahmad Nuxayevning yigitlari o‘ldirganini ma’lum qiladi. Biroq Rossiya muxolifati bu versiyani rad etib, FSB Annani o‘ldirib, Putinning tug‘ilgan kuniga sovg‘a tayyorlaganini aytib chiqadi.
Aleksandr Litvinenko
Aleksandr Litvinenko sovet davrida KGB, so‘ng FSB xodimi bo‘lib ishlagan, podpolkovnik unvonigacha olgan nufuzli xodim edi.
1998-yilda u FSBdagi boshliqlari taniqli milliarder Boris Berezovskiyni o‘ldirish bo‘yicha topshiriq berganini aytib chiqadi. Shundan so‘ng ko‘p o‘tmay uni FSBdan ishdan bo‘shatishadi.
Biroq FSB Litvinenkoni bo‘shatgandan keyin ham uni tinch qo‘ymaydi va sobiq xodimning har bir qadami kuzatiladi. Bundan maqsad aniq edi – mabodo Litvinenko shubhali ish qiladigan bo‘lsa uni darhol yo‘qotish.
1999-yil noyabrda FSB litvinenkoni hibsga oladi. Dekabr oyida hech qayerga ketmaslik sharti bilan u qo‘yib yuboriladi. Ko‘p o‘tmay unga qarshi jinoyat ishi qo‘zg‘atiladi. Shundan so‘ng u 2000-yilda Britaniyaga chiqib ketadi.
Sobiq FSB zobiti Londonga borib joylashgach o‘zi bilan barcha sirlarni oshkor qiladi. Jumladan, u 1999-yilda Rossiyaning bir nechta shahrida sodir bo‘lgan va chechen terrorchilari amalga oshirgan portlashlarni aslida FSB uyushtirganini aytadi. U bu ishning tafsilotlarini o‘zining “FSB Rossiyani portlatmoqda” kitobida batafsil bayon qilgan.
2006-yil 1-noyabr kuni Litvinenko Londondagi barlarning birida italiyalik advokat Mario Skaramella bilan uchrashadi. Uchrashuv davomida ovqatlanmaydi va faqat suv ichib o‘tiradi. Ana shu yerda u o‘zini yomon his qiladi.
Uchrashuvdan so‘ng oradan 16 soat o‘tgach u Boris Berezovskiyning ofisiga boradi va shu yerda milliarderning ikki nafar rossiyalik hamkori bilan uchrashadi. Shundan so‘ng uning mazasi qochadi va Litvinenkoni darhol kasalxonaga yetkazishadi.
Kasalxonada vrachlar Litvinenko talliy zaharli moddasi bilan zaharlanganiini aytishadi. Politsiya darhol ishga kirishadi, biroq Litvinenko italiyalik advokat bilan uchrashgan barda kuzatuv kameralari yo‘qligi tufayli u yerda nima bo‘lganini aniqlashning iloji bo‘lmaydi.
Berezovskiyning ikki nafar hamkori esa Litvinov bilan tez-tez uchrashib turishganini va uni zaharlanishiga aloqalari yo‘qligini ma’lum qilishadi.
Oradan qariyb uch hafta o‘tgach Litvinenko Londondagi universitet shifoxonasiga o‘tkaziladi. U yerda uning talliydan emas, poloniy radioaktiv moddasi yordamida zaharlangani oydinlashadi.
Zahar Litvinenkoning tanasida oqqonni keltirib chiqargan va uning tanasi juda tez ishdan chiqib boradi. 23-noyabr kuni u o‘limidan avval Islomni qabul qiladi va jon beradi. Uning o‘limidan so‘ng London politsiyasi sobiq FSB zobiti qasddan zaharlanganini ma’lum qiladi.
Keyinalik Litvinenkoni u Berezovskiyning ofisida uchrashgan Andrey Lugovoy zaharlagani oydinlashadi. Britaniya Rossiyadan Lugovoyni ekstraditsiya qilishni so‘raydi, biroq rad javobini oladi. Keyinchalik Litvinenkoni zaharlab o‘ldirish amaliyotiga o‘sha paytda FSBda ishlagan, hozirda Rossiya prezidenti yordamchisi lavozimida ishlab kelayotgan Nikolay Patrushev boshchilik qilgani aytiladi.
Sergey Yushenkov (2003-yilda o‘ldirilgan)
Sergey Yushenkov polkovnik unvonigacha olgan sobiq harbiy edi. U siyosiy faoliyatini SSSR parchalanishdan biroz avval boshlagan va keyinchalik 1994-yildan 1996-yilgacha Dumada Mudofaa qo‘mitasi rahbari bo‘lib ishlagandi.
Qo‘mita rahbarligidan bo‘shagach Sergey Rossiyadagi demokratik kuchlar safiga o‘tadi va amaldagi hukumatga muxolif bo‘ladi.
1999-yilda Sergey Yushenkov Rossiyaning bir nechta shahrida sodir bo‘lgan portlashlar yuzasidan surishtiruv olib boradi va ular Putin boshchiligidagi hukumat tomonidan uyushtirilganini aytib chiqadi. Shundan so‘ng sobiq harbiyning boshida qora bulutlar aylana boshlaydi.
2003-yil 17-aprel kuni Yushenkov Moskvadagi uyi oldida o‘ldirib ketiladi. Unga Makarov to‘pponchasidan uch marta o‘q uzilgandi. O‘sha paytda u 53 yoshda edi.
Surishtiruv davomida qotillik sodir etilgan joydan uncha uzoq bo‘lmagan joydan qo‘lqop topiladi. Tekshirib ko‘rilganda qo‘lqopdagi izlar to‘pponchadagi izlar bilan bir xilligi aniqlanadi.
Qo‘lqopda qolgan barmoq izlari tekshirib ko‘rilganda, ular Siktivkar shahrida yashovchi, avvalroq giyohvand moddalar savdosi tufayli qamalib chiqqan shaxsga tegishli ekani ma’lum bo‘ladi.
Gumonlanuvchi ushlanganda u Yushenkovni o‘ldirishni uning yaqin hamkori Mixail Kodanyov buyurtma berganini aytadi. Biroq Kodanyov aybini tan olmaydi. Shunday bo‘lsa ham keyinroq u buyurtmachi sifatida 20 yil, buyurtmani ijro etishga mas’ul bo‘lgan yana ikki shaxs 10 va 11 yil qamoq jazosi oladi.
Biroq Rossiya muxolifati Yushenkov FSB tomonidan usstalik bilan o‘ldirilgani va barcha ayblar uning yaqin hamkorlariga to‘nkalganini aytib chiqadi.
Yuriy Shchekochixin (2003-yilda o‘ldirilgan)
Yuriy Shchekochixin SSSR parchalanib ketishidan avval korrupsiya bilan bog‘liq jinoyatlar haqida yozib yurgan va sovetlarning jazo tegirmonidan omon qolgandi.
Oxir-oqibat u ham 1999-yilda Rossiyaning bir necha shahrida sodir bo‘lgan portlashlar bo‘yicha o‘tkazilgan surishtiruvlari ortidan o‘ldirib ketiladi.
Gap shundaki, Yuriy ham 1999-yilda ko‘p qavatli uy-joylarda sodir bo‘lgan portlashlarni chechen terrorchilari emas, balki endigina Rossiya tepasiga kelgan Putinning obro‘sini oshirish uchun FSB uyushtirganiga dalillar topgan va ularni “Novaya gazeta” nashrida e’lon qilgandi.
2003-yil iyulda Yuriy AQSHga safar qilishi kerak edi. Biroq parvozga uch kun qolganda u to‘satdan vafot etadi. Aslida Yuriyni to‘satdan vafot etdi deb ham bo‘lmaydi. Vafotidan sal avval birdaniga uning sochi to‘kiladi va o‘zi ozib ketadi.
Rossiya muxolifati Yuriy FSB tomonidan poloniy bilan zaharlanganini aytib chiqadi. Biroq Rossiya tergov qo‘mitasi va boshqa tegishli tashkilotlar uning murdasini tekshirishga ruxsat berishmaydi. Jurnalistning o‘limiga doir barcha hujjatlar mutlaqo maxfiy maqomiga o‘tkaziladi.
G‘ayrat Yo‘ldosh tayyorladi.
Izoh (0)