Pokiston hukumati Isroil bosh vaziri Binyamin Netanyaxuni rasman terrorchi deb eʼlon qilgan. Bu haqda Pokiston hukumati manbalariga tayanib, VOA News nashri xabar berdi.
Manbada aytilishicha, hukumat o‘ta o‘ng qanot namoyishchilar bosimi ostida ushbu qarorni eʼlon qilgan. Qaror Isroil rahbarini falastinliklarga qarshi urush jinoyatlari uchun javobgarlikka tortishni talab etadi.
Pokiston bosh vaziri Shahboz Sharif imzolagan qarorni siyosat va jamoat ishlari bo‘yicha davlat maslahatchisi Rana Sanaulloh bayonot tarzida o‘qib eshittirgan. Qaror loyihasi “Tahriki Labbaik Pokiston” (TLP) islomiy partiyasi talabi va hamkorligida ishlab chiqilgan.
“Netanyaxu terrorchi va urush jinoyatlarining ijrochisi. U terrorchi deb eʼlon qilinishi va xalqaro jinoyatlari uchun javob berishi kerak”, degan davlat maslahatchisi Rana Sanaulloh.
Maʼlumot o‘rnida, 20-iyul kuni poytaxt Islomobod yaqinida “Tahriki Labbaik Pokiston“ partiyasining minglab tarafdorlari Isroilning G‘azodagi hujumlarini qoralab miting o‘tkazgan edi. Ular hukumatdan Netanyaxuni terrorchi deb eʼlon qilishni, Isroil mahsulotlarini boykot qilishni va falastinliklarga yordam yuborishni talab qilgan.
Miting davomida ko‘pchilik Islomobodni qo‘shni shahar — Ravalpindi bilan bog‘laydigan gavjum yo‘lni to‘sib qo‘ygan. Bu esa yo‘lovchilar uchun jiddiy to‘siqlarga sabab bo‘lgan. Hukumat norozilik kuchaymasligi uchun yon berishni maʼqul ko‘rgan.
“Biz Netanyaxuni sudga berishni talab qilamiz. Bu shafqatsizlikni (Isroilning G‘azodagi harakatlari), Isroilni va unga aloqador barcha kuchlarni astoydil qoralaymiz”, deyiladi Pokiston rasmiylari xabarida.
Pokiston Isroil bilan diplomatik yoki savdo aloqalariga ega emas. Islomobod Isroil davlatini ham tan olmagan. Pokiston hukumati takror va takror 1967-yilgacha bo‘lgan chegaralarga asoslangan Falastin davlatini yaratish g‘oyasini qo‘llab-quvvatlab keladi.
Izoh (0)