Prezidentning “Turkiston jadidlik harakatining asoschisi, atoqli adib va jamoat arbobi, noshir va pedagog Mahmudxo‘ja Behbudiy tavalludining 150 yilligini keng nishonlash to‘g‘risida”gi qarori qabul qilindi. Bu haqda Prezident matbuot xizmati xabar berdi.
Qarorga ko‘ra, 2025-yili atoqli adib va jamoat arbobi, noshir va pedagog Mahmudxo‘ja Behbudiy tavalludining 150 yilligi keng nishonlanadi.
Mutafakkir adibning “Tanlangan asarlar” to‘plami, uning hayoti va faoliyatiga bag‘ishlangan ilmiy-ommabop kitoblar nashrga tayyorlanadi va chop etiladi.
Mahmudxo‘ja Behbudiy haqida spektakllar sahnalashtiriladi hamda bugungi kunga qadar yaratilgan “Mahmudxo‘ja Behbudiy” kinoseriali va “Xalq yuragi” badiiy-publitsistik filmlarining ommaviy namoyishlari tashkil qilinadi.
Badiiy akademiyaning Markaziy ko‘rgazmalar zalida Mahmudxo‘ja Behbudiy hayoti va ijodi, shuningdek, Turkiston jadidlik harakati namoyandalarining faoliyatiga oid tasviriy san’at asarlari ko‘rgazmasi uyushtiriladi.
Umumiy o‘rta ta’lim muassasalari, ijod maktablari o‘quvchilari, “Temurbeklar maktablari” kursantlari hamda OTMlar talabalari o‘rtasida “Mahmudxo‘ja Behbudiy saboqlari” mavzusida insholar tanlovi o‘tkaziladi.
Barcha bo‘g‘indagi ta’lim muassasalari, kutubxonalar, mehnat jamoalari, mahallalar va harbiy qismlarda taniqli olimlar va adiblar ishtirokida Mahmudxo‘ja Behbudiy hayoti va ijodiga bag‘ishlangan ijodiy uchrashuvlar, adabiyot va kitobxonlik kechalari tashkil qilinadi.
Oktyabr oyida Sharof Rashidov nomidagi Samarqand davlat universitetida “Mahmudxo‘ja Behbudiy merosi va jadidlik harakatini o‘rganishning dolzarb masalalari” mavzusida xalqaro ilmiy-amaliy konferensiya tashkil qilinadi. Noyabr oyida Alisher Navoiy nomidagi O‘zbekiston davlat akademik katta teatrida Mahmudxo‘ja Behbudiy tavalludining 150 yilligiga bag‘ishlangan tantanali adabiy-ma’rifiy xotira kechasi o‘tkaziladi.
Samarqand shahridagi Mahmudxo‘ja Behbudiy uy-muzeyi hududi obodonlashtiriladi hamda muzey ekspozitsiyasi boyitiladi. Qarshi shahridagi ko‘chalardan biriga Mahmudxo‘ja Behbudiy nomi beriladi hamda unga bag‘ishlangan yodgorlik lavhasi o‘rnatiladi.
2024-yilning oktyabr oyida O‘zbekistonda Imom Termiziy tavalludining 1200 yilligi keng nishonlanishi haqida xabar berilgandi.
2022-yili “Daryo” jamoasi Turkiston xalqiga jadidchilik harakati orqali istiqlol g‘oyasini olib kirgan inson Mahmudxo‘ja Behbudiy faoliyati xususida video tayyorlagandi.
2022-yilning sentyabr oyida O‘zbekiston mustaqilligining 31 yilligi arafasida Toshkentdagi Tasviriy san’at galereyasida jamoat arbobi, o‘zbek dramaturgiyasi asoschisi Mahmudxo‘ja Behbudiy xotirasiga bag‘ishlab “Samarqanddan maktublar” nomli ko‘rgazma tashkil etilgan edi. “Daryo” fotomuxbiri ushbu ko‘rgazmadan fotojamlanma tayyorlagandi.
Izoh (0)