Президентнинг “Туркистон жадидлик ҳаракатининг асосчиси, атоқли адиб ва жамоат арбоби, ношир ва педагог Маҳмудхўжа Беҳбудий таваллудининг 150 йиллигини кенг нишонлаш тўғрисида”ги қарори қабул қилинди. Бу ҳақда Президент матбуот хизмати хабар берди.
Қарорга кўра, 2025 йили атоқли адиб ва жамоат арбоби, ношир ва педагог Маҳмудхўжа Беҳбудий таваллудининг 150 йиллиги кенг нишонланади.
Мутафаккир адибнинг “Танланган асарлар” тўплами, унинг ҳаёти ва фаолиятига бағишланган илмий-оммабоп китоблар нашрга тайёрланади ва чоп этилади.
Маҳмудхўжа Беҳбудий ҳақида спектакллар саҳналаштирилади ҳамда бугунги кунга қадар яратилган “Маҳмудхўжа Беҳбудий” киносериали ва “Халқ юраги” бадиий-публицистик фильмларининг оммавий намойишлари ташкил қилинади.
Бадиий академиянинг Марказий кўргазмалар залида Маҳмудхўжа Беҳбудий ҳаёти ва ижоди, шунингдек, Туркистон жадидлик ҳаракати намояндаларининг фаолиятига оид тасвирий санъат асарлари кўргазмаси уюштирилади.
Умумий ўрта таълим муассасалари, ижод мактаблари ўқувчилари, “Темурбеклар мактаблари” курсантлари ҳамда ОТМлар талабалари ўртасида “Маҳмудхўжа Беҳбудий сабоқлари” мавзусида иншолар танлови ўтказилади.
Барча бўғиндаги таълим муассасалари, кутубхоналар, меҳнат жамоалари, маҳаллалар ва ҳарбий қисмларда таниқли олимлар ва адиблар иштирокида Маҳмудхўжа Беҳбудий ҳаёти ва ижодига бағишланган ижодий учрашувлар, адабиёт ва китобхонлик кечалари ташкил қилинади.
Октябрь ойида Шароф Рашидов номидаги Самарқанд давлат университетида “Маҳмудхўжа Беҳбудий мероси ва жадидлик ҳаракатини ўрганишнинг долзарб масалалари” мавзусида халқаро илмий-амалий конференция ташкил қилинади. Ноябрь ойида Алишер Навоий номидаги Ўзбекистон давлат академик катта театрида Маҳмудхўжа Беҳбудий таваллудининг 150 йиллигига бағишланган тантанали адабий-маърифий хотира кечаси ўтказилади.
Самарқанд шаҳридаги Маҳмудхўжа Беҳбудий уй-музейи ҳудуди ободонлаштирилади ҳамда музей экспозицияси бойитилади. Қарши шаҳридаги кўчалардан бирига Маҳмудхўжа Беҳбудий номи берилади ҳамда унга бағишланган ёдгорлик лавҳаси ўрнатилади.
2024 йилнинг октябрь ойида Ўзбекистонда Имом Термизий таваллудининг 1200 йиллиги кенг нишонланиши ҳақида хабар берилганди.
2022 йили “Дарё” жамоаси Туркистон халқига жадидчилик ҳаракати орқали истиқлол ғоясини олиб кирган инсон Маҳмудхўжа Беҳбудий фаолияти хусусида видео тайёрлаганди.
2022 йилнинг сентябрь ойида Ўзбекистон мустақиллигининг 31 йиллиги арафасида Тошкентдаги Тасвирий санъат галереясида жамоат арбоби, ўзбек драматургияси асосчиси Маҳмудхўжа Беҳбудий хотирасига бағишлаб “Самарқанддан мактублар” номли кўргазма ташкил этилган эди. “Дарё” фотомухбири ушбу кўргазмадан фотожамланма тайёрлаганди.
Изоҳ (0)