O‘zbekistonda 2022-yilga qadar aholi o‘z ehtiyojini qondirishi uchun ham elektr “tok”i ishlab chiqarsa, ta’qib qilingan. Bu ish xato sanalib, huquqiy asos yaratilmagani aytilgan. Prezidentning 2022-yildagi farmonidan so‘ng, o‘z ehtiyoji, shuningdek, sotishi uchun elektr energiyasi ishlab chiqaruvchi tadbirkorlar rag‘batlantirilishi, ularga qo‘shimcha imkoniyatlar yaratib berilishi e’lon qilindi.
“O‘zbekgidroenergo” mas’ullari ishtirokida bo‘lib o‘tgan matbuot anjumanida ayni shu masalada so‘z bordi, deya xabar berdi “Daryo” jurnalisti.
Foto: “O‘zbekgidroenergo” AJ axborot xizmati
Matbuot anjumanida so‘z olgan “Daryo” jurnalisti mas’ullarga yuzlanib, davlat rahbari farmonidan so‘ng, 10 yillar avval ham chekka qishloqlarda o‘zi uchun elektr “tok”i ishlab chiqarib, mas’ullar ta’qibidan qochib, ishini to‘xtatgan hamda bugungi kunda imkoniyat yaratilganidan ilhomlangan aholi qanday natijalarga erishayotgani bilan qiziqdi.
O‘zim yaxshi biladigan Qashqadaryo viloyatining Ko‘l qishlog‘ida yashovchi aholi bundan 10 yillar oldin ham yonidan oqib o‘tgan suvlar orqali elektr “tok”i ishlab chiqargan va ehtiyojini qondirgan. Biroq mas’ullar bu ish xato ekanini aytib, ularni ta’qib qilishi “tok” ishlab chiqarishning rivojlanmay qolishiga sabab bo‘lgan. Davlat rahbari tomonidan qonuniy asos yaratilib, imkoniyatlar berilgach, oldin o‘zi uchun elektr ishlab chiqargan aholi bugun qanday natijalarga erishmoqda? — dedi jurnalist.
“O‘zbekgidroenergo” AJning xususiy investorlar tomonidan amalga oshiriladigan loyihalarni muvofiqlashtirish boshqarmasi boshlig‘i Avazbek Zokirovning ma’lumot berishicha, ular 2018—2022-yillar davomida 10 dan ortiq mikroGESlarni ishlatib ko‘rgan va samaradorligi yuqoriligiga guvoh bo‘lgan.
-5pa3c-c3.jpg)
MikroGESlarni ishlatib ko‘rganimizda ular kam suv bilan ham elektr energiyasi ishlab chiqarishiga guvoh bo‘ldik. Bu samaradorlikni ko‘rgan prezidentimiz bizga shu haqda farmonni qabul qilib berdilar. Shu asosida ushbu loyiha boshlandi, — dedi Avazbek Zokirov.
Mas’ulning bildirishicha, aholi o‘zi uchun yoki qo‘ni-qo‘shnilar, mahalla uchun elektr energiya ishlab chiqarmoqchi bo‘lsa, hech qanday muammo yo‘q.
Tadbirkor mahallasi uchun uskuna sotib olib, mikroGES qurib, mahallasini elektr energiyasi bilan ta’minlash barobarida, ishlab chiqargan elektr energiyasini sotishi ham mumkin, — dedi mas’ul.
Avazbek Zokirovning qo‘shimcha qilishicha, kelajakda Ko‘l qishlog‘ida ham mikroGESlar qurilishi mumkin.
Ko‘l qishlog‘idagi suv gidrologiyasi bo‘yicha mikroGES qurish imkoniyatini bersa, tadbirkor tomonidan yoki “O‘zbekgidroenergo” AJ tomonidan mikroGES quriladi. Bunda hech qanday muammo yo‘q, — dedi u.
Izoh (0)