Qozog‘istonlik hujumchi Dastan Satpayev UEFA Chempionlar Ligasi tarixida gol urgan eng yosh futbolchiga aylandi. 16 yosh-u 330 kunlik futbolchi “Qayrat” safida Sloveniyaning “Olimpiya” klubiga qarshi kechgan birinchi saralash bosqichi uchrashuvida gol urib, tarixga kirdi. Bu haqda Sports nashri xabar berdi.
Satpayev bu natija bilan avvalgi rekordchi, “Barselona” hujumchisi Ansu Fatini ortda qoldirdi. Fati Chempionlar Ligasi tarixida ilk golini 17 yosh-u 40 kunligida urgan edi.
Qiziq tomoni shundaki, joriy yil fevral oyida Satpayev Angliyaning “Chelsi” klubi bilan shartnoma imzolagan. “Aristokratlar” uni “Qayrat”dan 4 million yevro evaziga sotib olgan edi. U 18 yoshga to‘lgach, rasman London klubiga qo‘shiladi.
Ma’lumot uchun, Chempionlar Ligasi birinchi saralash bosqichi doirasidagi “Olimpiya” — “Qayrat” uchrashuvi 1:1 hisobida yakunlandi. Javob o‘yini 15-iyul kuni Olmaotada bo‘lib o‘tadi. G‘olib jamoa keyingi bosqichda Finlyandiyaning “KUPS” va Moldovaning “Milsami” jamoalari o‘rtasidagi juftlik g‘olibi bilan to‘qnashadi.
Eslatib o‘tamiz, joriy mavsum Yevrokubok saralashida Qozog‘istondan “Qayrat”dan tashqari “Aktobe”, “Ordabasi” va “Astana” jamoalari ham ishtirok etmoqda.
Izoh (0)