O‘zbekistonda hududiy elektr tarmoqlari boshqaruvini xususiy sektorga berish boshlanadi

Joriy yilning oktyabrida Samarqand viloyatidagi elektr tarmoqlariga xususiy operator jalb qilish bo‘yicha tender eʼlon qilinadi. Bu haqda 20-avgust kuni prezident Shavkat Mirziyoyev va tadbirkorlar uchrashuvida maʼlum qilingan.

Prezident matbuot xizmati xabariga ko‘ra, muloqotda so‘nggi yillarda energetika sohasida xususiy sektorga keng yo‘l ochib berilgani aytilgan.

“Bu orqali 3,5 milliard dollarlik xususiy sheriklik loyihalari ishga tushdi va yana 31,5 milliard dollarlik 50 ta loyiha bo‘yicha ishlar jadal davom etmoqda. Hududiy elektr tarmoqlarining boshqaruvini xususiy sektorga berishda amaliy bosqich boshlanadi. Xususan, oktyabrda Samarqand viloyatidagi elektr tarmoqlariga xususiy operator jalb qilish bo‘yicha tender eʼlon qilinadi. Kelgusi yil Jizzax va Sirdaryoda ham xuddi shunday ishlar amalga oshiriladi”, deyiladi manba xabarida.

Joriy yil 10-iyul kuni senatorlar yangi tahrirdagi “Elektr energetikasi to‘g‘risida”gi qonunni maʼqullagandi. Hujjatdan o‘rin olgan masalalardan biri — respublikada elektr energiyasining erkin va raqobatli bozorini tashkil etishdir.

Qonunning Senatdagi muhokamasida Energetika bozorini rivojlantirish va tartibga solish agentligi direktori Sherzod Xo‘jayev ayrim masalalarga to‘xtalgandi. Xususan, masʼul O‘zbekistonda elektr energiyasi bozori tashkil etilib, savdolar onlayn amalga oshirilishini aytgandi.

“Elektr energiyasining raqobatli ulgurji bozori tashkil etilganda, barcha savdo operatsiyalari onlayn platforma orqali amalga oshiriladi. U yerda shakllanayotgan narxlar nafaqat bozor uchun, balki keng omma uchun ham ochiq bo‘ladi. Internetdagi sahifa yoki mobil ilova orqali onlayn kuzatib borishga imkoniyat yaratiladi. Bundan tashqari, tartibga solinadigan tariflar, davlat tomonidan belgilanadigan narxlarni shakllantirish metodologiyasi ham ochiq va shaffof bo‘ladi”, degan agentlik rahbari.

Sherzod Xo‘jayevning qo‘shimcha qilishicha, elektr energiyasi narxlarini shakllantirishda korxonalardagi ishlab chiqarish xarajatlari va rentabellik darajasi ham keng omma uchun ochiqlanadi.