O‘zbekistonlik tadbirkorlar quyosh paneli o‘rnatishga majburlanib, elektr tokidan mahrum qilinsa, Vazirlar Mahkamasi huzuridagi elektr energiyasi, neft mahsulotlari va gazdan foydalanishni nazorat qilish inspeksiyasiga murojaat qilishlari mumkinligi ma’lum qilindi. Bu haqda AOKAda bo‘lib o‘tgan matbuot anjumanida “O‘zenergoinspeksiya” boshlig‘i o‘rinbosari Xurshidjon Eshqo‘ziyev ma’lum qildi.
Xurshidjon Eshqo‘ziyev OAV vakillari savoliga javob berar ekan, so‘ngi paytlarda ijtimoiy tarmoqlarda quyosh paneli o‘rnatishga majburlov va elektr tokini o‘chirib ketish bilan bog‘liq holatlarni ko‘p ko‘rayotganini aytdi.
Bu birinchidan iste’molchi va ta’minotchi korxona o‘rtasida tuzilgan shartnomada yozib qo‘yilgan. Qaysi paytda iste’molchi elektr tokidan uzilib qo‘yishi belgilangan. Shundan kelib chiqqan holda iste’molchilar ham o‘z haq-huquqini to‘g‘ri bilib, bunday paytlarda iste’molchilar huquqlarini himoya qiluvchi tashkilotlarga yoki sudga murojaat qilishlari kerak, dedi mas’ul.
Xurshidjon Eshqo‘ziyev “Daryo” jurnalistining “Tadbirkorning sudma-sud yurishga vaqti ham xohishi ham yo‘q bo‘lsa, sizlarga murojaat qilsa-chi?”, degan savoliga “Murojaat qilishsa, vakolatimiz doirasida yordam beramiz”, deya javob qaytardi.
Matbuot anjumanida bildirilishicha, Vazirlar Mahkamasi huzuridagi elektr energiyasi, neft mahsulotlari va gazdan foydalanishni nazorat qilish inspeksiyasining 74 nafar xodimi bilim darajasi qoniqarsiz deb topilgan. Inspeksiyaning 3 ta viloyatdagi boshqarma boshliqlari rotatsiya qilingan. Jumladan, Qashqadaryo viloyati mas’uli Surxondaryoga, Navoiy viloyatidagi rahbar Namanganga, shuningdek, namanganlik mas’uli Navoiyga o‘tkazilgan.
Izoh (0)