Qashqadaryo viloyatidagi Shahrisabz shahri hokimligining hududdagi tadbirkordan 701 million so‘mdan ortiq qarzdorligi bor. Qarzdorlik masalasi sudda ham ko‘rib chiqilib, ijroga o‘tgan. Ammo necha oylar o‘tsa-da, ijro ta’minlanmayapti. Bu haqda “Daryo”ga hokimlikdan pulini ololmayotgan tadbirkorning o‘zi hikoya qilib berdi.
Shahrisabz shahrining “Oqsaroy” mahallasida yashovchi Olim Xidirovga ko‘ra, ish sudda 2024-yil 23-aprelda ko‘rib chiqilgan.
“Lok bo‘yoq” MCHJ rahbariman. Prezidentimizning 2022-yil Qashqadaryo viloyatiga tashrifiga tayyorgarlik chog‘ida tashkilotimiz “Mebel ishlab chiqarish” loyihasini amalga oshirish, shuningdek, Shahrisabz shahrining tarixiy qismini obodonlashtirish, ko‘kalamzorlashtirish ishlarini bajarib, 1 milliard so‘mlik shartnoma shartini bajargan. Bu pulning 500 million so‘mini bizga 2023-yilning uchinchi chorak daromadlari rejasini oshirib bajarilgan qismidan to‘lab beramiz, deyishgandi. Ayni kungacha 1 milliard so‘m mablag‘dan atigi 200 million so‘m oldim. Shu ishlarni bajarish uchun qilingan xarajatlarim hisobiga ayni kunda ancha qarzga botdim. Pullarimni har kuni so‘rayman, lekin natija yo‘q, deydi tadbirkor.
Tadbirkorning ma’lumot berishicha, unga to‘langan 200 million so‘m viloyat hokimligi tomonidan to‘lab berilgan bo‘lib, qolgan pullar ham bosqichma-bosqich to‘lanishi bildirilgan.
Viloyat hokimining birinchi o‘rinbosari Alisher Qodirov qolgan pullar ham sekin-asta to‘lab berilishini aytib, murojaatimga javob bergan ekan. Lekin men kutishdan charchadim. Bankrot bo‘ldim. Qarzga kirdim, deydi tadbirkor.
“Daryo”ga taqdim qilingan hujjatlardan anglashilishicha, Shahrisabz shahrining sobiq va ayni kundagi rahbarlari 1 milliard so‘mlik qarzdorlikni to‘lash uchun viloyat hokimidan yordam so‘rab, xat yozgan.
Shahrisabz shahrining ayni kunda lavozimdagi rahbari Sherzod Bo‘riyev “Daryo” jurnalistining takroriy qo‘ng‘iroqlariga javob bermadi.
-liw6REl1.jpg)
Hokimlikning hozirda mehnat ta’tilida bo‘lgan axborot xizmati rahbari Gulnora Uzoqovaning tushuntirish berishicha, hokim bu haqdagi murojaatlarga javoban qarzdorlik sobiq hokim davrida yuzaga kelganini, qarzdorlik miqdori katta va buni shahar mahalliy byudjetidan qoplash imkonsiz ekanini aytgan.
Sobiq hokim Akrom Sulaymonov esa bunga javoban hokimlikka kelib, qarzdorlik uning shaxsiy tomorqasini obodonlashtirishdan kelib chiqmaganini, davlat rahbari tashrifi paytida hududda amalga oshirilgan ish uchun yuzaga kelganini aytib, tadbirkorning puli mavjudligini tasdiqlagan. Shunga qaramasdan muammo haligacha yechim topmagan.
MIB Qashqadaryo viloyati boshqarmasi mas’ullarining holatni izohlashicha, qarzdor — Shahrisabz shahrining tarixiy qismini obodonlashtirish, ko‘kalamzorlashtirish va saqlash departamentining mol-mulki qarzdorlikni qoplash uchun auksion savdoga qo‘yilgan.
Qarzdor — Shahrisabz shahrining tarixiy qismini obodonlashtirish, ko‘kalamzorlashtirish va saqlash departamentining davlat raqami 70 623 QBA bo‘lgan “KamAZ” rusumli avtotransport vositasi xatlanib, 1 milliard 209 million so‘mga baholangan hamda 2-avgust kuni auksion savdosiga chiqarilgan. Ushbu avtotransport vositasi sotuvidan tushgan pul mablag‘lari qarzdorlikni qoplashga yo‘naltiriladi, deydi mas’ullar.
“Daryo” mazkur holat bo‘yicha mas’ullarga minbar berishga tayyorligini eslatib o‘tadi.
Izoh (0)