“Uylanish”, “Janob hech kim”, “Mening akam bo‘ydoq”, “Kichkina xo‘jayin” va boshqa ko‘plab filmlardagi roli orqali millionlab muxlislarning qalbidan joy olgan mahoratli aktyor va xonanda Alisher Uzoqov 25-avgust kuni 38 yoshni qarshi oldi. Shu munosabat bilan “Daryo” nashri aktyorning hayot va ijod yo‘li haqida ma’lumot beradi.
San’atkorlar oilasining davomchisi
Aktyor, xonanda va rejissor Alisher Uzoqov 1984-yil 25-avgust sanasida Toshkent shahrida tug‘ilgan. Uning otasi marhum Muhammad Uzoqov ham aktyor, onasi Shohida Uzoqova esa o‘zbek kino olamida o‘z o‘rniga ega aktrisalardan biri hisoblanadi. Alisher Uzoqovning bobosi Ma’murjon Uzoqov O‘zbekiston xalq hofizi sifatida xalq e’tirofiga sazovor bo‘lgan. Aktyorning bolaligi teatrda o‘tgan va o‘sha paytlarda u bir nechta spektakllarda ishtirok etgan. Keyinchalik, u san’atga bo‘lgan qiziqishi tufayli shu sohada tahsil olishga qaror qilib, 2001-yildan 2005-yilgacha O‘zbekiston davlat san’at institutida o‘qiydi.
Nafaqat o‘zbek kino olamida, balki chet elda ham shuhrat qozongan aktyor
Alisher Uzoqovning ilk debyuti Rossiya kinoijodkorlari tomonidan 2003-yilda suratga olingan “Velikan” qisqa metrajli filmida bo‘lgan. Shundan so‘ng u yana rus kinoijodkorlari bilan hamkorlik qildi va “Zastava” serialida bosh qahramonlardan birini ijro etdi. Ushbu serialdagi ijrosi aktyorga chet elda ham muvaffaqiyat qozonishiga sabab bo‘ldi. “Zastava” serialida giyohvand moddalar savdosi yo‘liga to‘sqinlik qilgan, o‘z hayotini xavf ostiga qo‘ygan harbiylarning jasorati, o‘z vatanining chegaralarini himoya qilish hayotning bir qismiga aylanganlar haqida hikoya qilinadi. Ushbu filmdan so‘ng aktyorga ko‘plab o‘zbek rejissorlari tomonidan takliflar tusha boshlaydi.
Aktyor 2008-yilda “Telba” filmida epizod rolni ijro etdi va tomoshabinlar e’tiboriga tusha boshladi. Shundan so‘ng Alisher Uzoqov 2009-yilda aktrisa Asal Shodiyeva bilan partnyorlikda “Janob hech kim” filmida bosh rolni ijro etdi va o‘zbek kino olamida katta shuhrat qozondi. Shundan keyin aktyor 40 dan ortiq filmlarda suratga tushdi. Alisher Uzoqov ishtirokidagi “Mening akam bo‘ydoq”, “Endi dadam bo‘ydoq”, “Uylanish”, “Kirakash”, “O‘gay ona”, “Men talabaman”, “Tundan tonggacha” filmlari ko‘plab muxlislarning qalbidan joy olgan.
https://www.youtube.com/watch?v=ouCLHQHEXH0&t=3065s
Otasi vafot etgan vaqtda suratga olish jarayonlarida bo‘lgan va keyinchalik akasini topgan
Alisher Uzoqov “Daryo” internet-nashriga bergan intervyusida otasining vafotidan keyin otasining boshqa oilasidan bo‘lgan akasini topganini aytgan. Ma’lum bo‘lishicha, aktyor otasi vafot etgan vaqtda bir serialning suratga olish jarayonlarida bo‘lganini va hayotidagi yagona armoni ham shu ekanini, otasining vafotidan so‘ng akasini topganini ta’kidlagan. Alisher Uzoqov akasi otasining boshqa oilasidan ekanini, biznes bilan shug‘ullanishini, u o‘zidan ham ko‘proq otasiga o‘xshashini ma’lum qilgan.
Aktyorning turmush o‘rtog‘i va farzandlari haqida
Aktyor 2011-yilda Mohinur ismli qiz bilan turmush qurgan. Aktyorning to‘yida mashhur futbolchi Odil Ahmedov kuyovjo‘ra bo‘lgan. Hozirda ularning ikki nafar: bir o‘g‘il va bir qiz farzandi bor. Aktyorning rafiqasi Mohinur Uzoqova hozirda maktabgacha ta’lim muassasasida logoped bo‘lib ishlaydi.
O‘n yil haydovchilik guvohnomasisiz mashina boshqargan
Alisher Uzoqov 2017-yilda “Daryo” nashriga 10 yil haydovchilik guvohnomasisiz mashina boshqarganini ma’lum qilgan. “O‘n yil davomida haydovchilik guvohnomasisiz mashina boshqarganman. Yo‘l-patrul xizmati xodimlari to‘xtatib, yaxshi ko‘rishgani bois doim qo‘yib yuborishgan”, — degan edi aktyor.
Alisher Uzoqov “zapret”ga tushgani va bunga nima sabab bo‘lgani to‘g‘risida
Aktyor Alisher Uzoqov “Chotki TV” YouTube-kanaliga bergan intervyusida 2012-yilda bir necha yilga “zapret”ga tushgani, zapret uni butunlay boshqa insonga aylantirgani haqida so‘zlab bergan. Alisher Uzoqovning taxmin qilishicha, uning norasmiy taqiqqa tushishiga Gulnora Karimova tashabbusi bilan har yili an’anaviy tarzda o‘tkazilgan M&TVA taqdirlash marosimida bir yo‘la ikki nominatsiyada g‘olib deb topilishi sabab bo‘lgan bo‘lishi mumkin.
“Bilmasam, oxirgi 2012-yil bir emas, ikkita M&TVA’ni olganimda hammani ko‘ziga ko‘rinib qolgan bo‘lsam kerak, deb o‘ylayman. Ikkita olganim uchun ham ko‘zga ko‘rinib qoldim, shekilli, menimcha. Aynan meni taqiqqa tushirgan insonlar, u payt meni topish muammo emasdi, Alisher, mana buni qilib qo‘yganding, xatoying shu edi, desa. Men qo‘lini o‘paman shu odamning, rahmat deyman. Siz meni xatoyimni aytyapsiz, ertaga shuni qilmay, hali yoshman-ku?! Dinimizda ham bor xatosini, kamchiligini aytish.
Men har doim aytaman va ko‘pchilik xafa ham bo‘ladi. Yaqinlarimga to‘g‘ridan to‘g‘ri aytaman kamchiliklarini, menga aytishmaydi. Haliyam kech emas, o‘sha odam bilsa, chaqirib aytsin. Rahmat, deyman, qayerda edingiz shuncha yildan beri, deyman. Xato qilgan bo‘lsam, bilishim kerak, o‘sha xatoni ertaga takrorlamasligim uchun. Yana takrorlashni xohlamayman, chunki hamma ham xato qiladi, — deydi Alisher Uzoqov.
“Zapret”ga tushganidan so‘ng yonida hech kim qolmagan va 20 ming so‘mlik doriga pul topa olmagan
Aktyor 2019-yilda “Daryo” internet-nashriga bergan intervyusida “zapret”ga tushganidan so‘ng yonida hech kim qolmagani va shundan so‘ng sohasiga bo‘lgan munosabati o‘zgargani haqida gapirgan.
“Depressiya bo‘ladi, shuncha qiyinchilikni depressiyasiz o‘tkazish uchun odam bez bo‘lishi, yuzi va yuragi eshakning terisidan bo‘lishi kerak. Taqiqdan keyin ancha ko‘zim ochildi, ishimga bo‘lgan munosabatim o‘zgardi. Men avvalgi Alisher emasman. Butunlay o‘zgardim. Boshimdan o‘tganlarini dushmanimga ham ravo ko‘rmasdim. Chunki faqat kino sohasida ijod qilayotgan ijodkor uchun shunchaki 3,5 yil uyda o‘tirish juda qiyin. ‘Zapret’ sababini bilmayman. Hech kim buning sababini, nimagaligini aytmagan. O‘sha paytlar yonimda hech kim qolmadi, eshigimni birov taqillatib kelmadi. Shuning uchun ham hozir kimdir kelib yaxshi gapirsa, uni nima uchun bunaqa gapirayotganini yaxshi bilaman. O‘shandan so‘ng ishimga, sohaga bo‘lgan munosabatim o‘zgardi.
“O‘sha payt burnimda bir kasallik bor edi, burnim tez-tez bitadi, unga dori olib sepib yurishim kerak. O‘sha paytlarda u dori 20 ming so‘m turardi. Hattoki o‘sha dorini olishga ham pulim bo‘lmay qolgandi. Keyin 2-3 ming so‘mga naftizin olib, tomizib yurdim. Uyimga kelib, eshigimni taqillatib, to‘yga 400, 500, 800 dollar beraman deyishganida chiqmaganman. Noshukrlik qilmaganman. Shunday qiyinchilik bo‘lishi kerak ekan, chidadim”, — degan edi aktyor.
Futbol sevuvchi mahoratli sharhlovchi va “Navbahor” futbol klubi PR-direktori
Aktyor bir muddat Futbol TV telekanalida faoliyat yuritgan va oradan ko‘p o‘tmay vaqt masalasi sabab sharhlovchilikdan ketishga majbur bo‘lgan. Keyinchalik Alisher Uzoqov bir o‘yinni sharhlashda bilmasdan so‘kinib yuborgani sabab ishdan ketgani haqida mish-mishlar tarqalgan, aktyor esa buni rad etgan. Futbol sport turi bo‘yicha ham tajribaga ega bo‘lgan Alisher Uzoqov 2018-yilda “Navbahor” futbol klubida pr-direktor sifatida faoliyat olib borgan. U jamoaning ommaga yanada yaxshiroq tanilishi borasida xizmat qilgan.
“Sevgi iztirobi”dagi Amirni o‘zbekcha gapirtirgan aktyor faoliyatidagi qaysi filmda qiynalgani haqida
Dublyaj sohasida ham mahoratga ega aktyor millionlab muxlislarning qalbidan joy olgan “Sevgi iztirobi”dagi Amir obraziga ovoz bergan. Alisher Uzoqov turkiyalik aktyor Kaan Urganji o‘g‘li 2019-yilda rejissor Rustam Sa’diyevning “Baron 2” filmida suratga tushish uchun Toshkentga kelganida u bilan ko‘rishgan.
Alisher Uzoqov faoliyatidagi boshqa filmlarda 2019-yilda suratga olingan “Elparvar” filmida ijro etgan obrazidagi kabi qiynalmaganini aytgan edi.
“Rostini aytaman, bu filmda qiynalganchalik boshqa filmlarda qiynalmaganman. O‘zimni ushlashga ko‘p vaziyatlarda harakat qildim. Qaysidir jabhalarda buning uddasidan chiqdim. Lekin hamma vaziyatda ham emas. Buning uchun ijodiy guruhdan uzr so‘rayman. Rejissor Abduvohid G‘aniyevga juda ham qiziq jarayon uchun rahmat. Bu film barchaga yoqadi degan umiddaman”, — deb fikr bildirgan edi rejissor.
Mashhur xonandalarning kliplaridagi turfa xil obrazlar sohibi
Alisher Uzoqov o‘zbek shou-biznesidagi ko‘plab mashhur xonandalarining xit taronalariga ishlangan videoklipda suratga tushgan. Masalan, Rayhonning “Tomchi”, “Yurak”, “Xalos et” Ozoda Nursaidovaning “Do‘st”, Janob Rasulning “Yolg‘on dunyo”, Ziyodaning “Tamara”, Hamdam Sobirovning “Esla meni” kliplaridagi ijrolari bir-biriga umuman o‘xshamaydi.
Ko‘plab yulduzlarni kashf etgan va mashhur loyihalar asoschisi
Alisher Uzoqov asos solgan loyihalar ko‘plab yangi yulduzlarning yaralishiga sabab bo‘ldi. Shunday loyihalardan biri 2017-yilda “Zo‘r TV” telekanali orqali muxlislarga taqdim etilgan “The cover up” loyihasi hisoblanadi. Bu loyiha hozirda millionlab muxlislarga ega Yorqinxo‘ja Umarov, Afruza, G‘aybulla Tursunov, Zahida, Laliddin Xolmatov kabi xonandalarning iste’dodini yangi bosqichga olib chiqdi. Keyinchalik ko‘plab yosh iste’dod egalarini kashf etgan “The cover up kids” loyihasi ham o‘z muxlislarini topdi.
Xit taronalar ijrochisi
Alisher Uzoqov iste’dodli aktyor, shu bilan birga ko‘plab xit taronalarni ijro etgan xonanda sifatida ham e’tiborga tushgan. Uning ijrosidagi “Nahotki”, “Oshiq yurak”, “Mubtaloman”, “Qorako‘zim”, “Kerak emas menga” taronalari hali hamon sevib tinglanadi. U xonandalik faoliyatidagi uzoq tanaffusdan so‘ng “O‘tgusidir” nomli taronasiga ishlangan videoklipni muxlislariga taqdim etdi.
Mavzuga doir:
- Muxlisni siltab tashlagan Shohjahon Jo‘rayev, tomoshabinga tarsaki tushirgan Alisher Uzoqov: San’atkorlarni qanday holatlar asabiylashishga majbur qiladi? (video).
- Javohir Zokirov, Alisher Uzoqov, Sitora Farmonova. Chet el kinofilmlarida rol ijro etgan o‘zbek aktyorlari (video).
- Instagram: Umidaxon yangi uyli, Odina To‘xtasinova mashinali bo‘ldi, Alisher Uzoqov kumiri bilan uchrashdi, Doston Ergashev YPX xodimining to‘yida bepul xizmatda bo‘ldi.
- Instagram: O‘zbekistonni tark etgan Alisher Uzoqov, eri bilan yarashganini inkor etgan Maryam Tillayeva, Ozoda konsertidagi g‘ayrioddiy holatlar.
Izoh (1)
Табриклаймиз!