AQSH Mudofaa vaziri Lloyd Ostin Kiyev ittifoqchilarini Rossiyaning urushni cho‘zishiga yo‘l qo‘ymaslik uchun qurol yetkazib berishni tezlashtirishga chaqirdi. Vazir bu haqda Ukraina mudofaasiga oid aloqa guruhi yig‘ilishi yakunlari bo‘yicha o‘tkazilgan matbuot anjumanida gapirdi.
“Ukraina behuda vaqt yo‘qotolmaydi. Aloqa guruhidagi hamkasblarimiz ham zimmamizdagi majburiyatlarni, jumladan, zirhli texnikalarimizni jang maydoniga yetkazish va ukrainalik askarlarni tegishli tayyorgarlikdan o‘tkazishni tez va to‘liq bajarishimiz kerakligini tushunadi. Shuningdek, biz imkon qadar tezroq yangi tizimlardan foydalanish uchun zarur bo‘lgan ehtiyot qismlarini yetkazib berish va texnik xizmat ko‘rsatishni tashkillashtirishimiz kerak”, — dedi Ostin.
Vazirning qo‘shimcha qilishicha, uchrashuv yakunida guruh aʼzolari Ukrainani qo‘llab-quvvatlashni davom ettirish qatʼiyatini tasdiqlagan. Xususan, u Shvetsiya Ukrainaga 10 ta Leopard tanki va havo hujumidan mudofaa uchun asosiy komponentlar yetkazib bermoqchiligini aytdi. O‘z navbatida, Norvegiya AQSH bilan birgalikda Kiyevga ikkita NASAMS zenit raketalari tizimini topshiradi.
Ostinning ta’kidlashicha, Rossiya urushda g‘alaba qozonishga intilmoqda, ammo buning uchun resurslari yo‘q.
“Rossiya Eron va Shimoliy Koreyaga tayanishga majbur bo‘lmoqda, rus armiyasining esa Ikkinchi jahon urushi qurollaridan foydalanishiga to‘g‘ri kelmoqda. Rossiyaning harbiy mulki va do‘stlari tugab bormoqda. Shu bilan birga, Vladimir Putin bir yillik urushda Qo‘shma Shtatlar va Aloqa guruhi Ukrainani uzoq muddatda qo‘llab-quvvatlashga tayyor ekanini ko‘rgan bo‘lsa kerak. Putin hamon Ukrainaning tinkasini quritishga va bizni charchatishga umid qilmoqda, ammo biz ham taslim bo‘lmaymiz”, — dedi u.
2022-yilning kuzida Rossiya armiyasi Eronda ishlab chiqarilgan Shahed-131/136 kamikadze dronlaridan faol foydalana boshladi, ular Rossiyada Geran-1 va Geran-2 deb nomlandi.
2023-yil fevralida Eron Rossiyaga ko‘p marta foydalanish mumkin bo‘lgan uzoq masofali hujumchi dronlar partiyasini topshirgani ma’lum bo‘ldi. Mart oyida Financial Times gazetasi Eron rossiyalik harbiylarni ballistik raketalar bilan taʼminlashni boshlashga tayyorligini yozgandi, biroq nashrga ko‘ra, Rossiya hozirgacha bunday xaridlardan o‘zini tiygan, chunki u Qo‘shma Shtatlar bunga javoban Ukrainaga ATACMS uzoq masofali raketalarni yetkazib bera boshlashidan qo‘rqmoqda.
Shuningdek, Amerika razvedkasi ma’lumotlariga ko‘ra, Rossiya o‘z zahiralarining tugashi tufayli Shimoliy Koreyadan artilleriya snaryadlari, qisqa va o‘rta masofali raketalarni faol ravishda sotib olgan. Rossiya rasmiylari bu xabarlarni “G‘arb OAVlarining uydirmasi” deb atadi.
Izoh (0)