Олий Мажлис Қонунчилик палатасининг 18 ноябрь куни ўтказилган янги таркибдаги биринчи мажлисида Қонунчилик палатаси қўмиталари тузилиб, раислари сайланди.
Қуйидаги 10 та қўмита тузилди:
- Аграр ва сув хўжалиги масалалари қўмитаси;
- Бюджет ва иқтисодий масалалар қўмитаси;
- Демократик институтлар ва фуқаролик жамиятини ривожлантириш масалалари қўмитаси;
- Инновацион ривожланиш ва ахборот технологиялари масалалари қўмитаси;
- Коррупцияга қарши курашиш ва суд-ҳуқуқ масалалари қўмитаси;
- Меҳнат, соғлиқни сақлаш ва ижтимоий масалалар қўмитаси;
- Тадбиркорлик, рақобатни ривожлантириш ва саноат масалалари қўмитаси;
- Фан, таълим, маданият, спорт ва ёшлар масалалари қўмитаси;
- Халқаро ишлар, мудофаа ва хавфсизлик масалалари қўмитаси;
- Экология ва атроф-муҳитни муҳофаза қилиш масалалари қўмитаси.
Равшан Мамутов Аграр ва сув хўжалиги масалалари қўмитаси раиси этиб, Шарофиддин Назаров Бюджет ва иқтисодий масалалар қўмитаси раиси этиб, Гулрух Агзамова Демократик институтлар ва фуқаролик жамиятини ривожлантириш масалалари қўмитаси раиси этиб, Илҳом Абдуллаев Инновацион ривожланиш ва ахборот технологиялари масалалари қўмитаси раиси этиб, Жаҳонгир Ширинов Коррупцияга қарши курашиш ва суд-ҳуқуқ масалалари қўмитаси раиси этиб, Бобур Бекмуродов Тадбиркорлик, рақобатни ривожлантириш ва саноат масалалари қўмитаси раиси этиб, Нодир Жумаев Фан, таълим, маданият, спорт ва ёшлар масалалари қўмитаси раиси этиб, Улуғбек Шерматов Халқаро ишлар, мудофаа ва хавфсизлик масалалари қўмитаси раиси этиб, Хайрулло Ғаффоров Экология ва атроф-муҳитни муҳофаза қилиш масалалари қўмитаси раиси этиб сайланди.
Меҳнат, соғлиқни сақлаш ва ижтимоий масалалар қўмитаси раиси лавозими ҳозирда вакант қолди.
Қонунчилик палатаси қўмиталари
Қўмиталар қонун лойиҳаларини тайёрлаш ишини олиб бориш, Қонунчилик палатаси муҳокамасига киритиладиган масалаларни дастлабки тарзда кўриб чиқиш ва тайёрлаш, Ўзбекистон қонунлари ҳамда палата томонидан қабул қилинадиган қарорларнинг ижросини назорат қилиш учун Қонунчилик палатасининг ваколатлари муддатига Қонунчилик палатаси депутатлари орасидан раис, унинг ўринбосари ва аъзолардан иборат таркибда қўмиталар сайланади.
Қўмиталар Ўзбекистон қонунлари ва Қонунчилик палатаси қарорларининг ижро этилиши устидан назоратни амалга оширади.
Қўмита раиси қўмита иш режаси лойиҳаси тайёрланишини ташкил этади ва қўмитанинг тасдиқланган иш режаси бажарилиши устидан назоратни амалга оширади. Зарур материаллар тайёрланишини ташкил этади, қўмита мажлисларини чақиради ва уларда раислик қилади. Киритилган қонун лойиҳаларини кўриб чиқиш бўйича ишчи гуруҳларининг ишида қатнашиш, шунингдек қўмитанинг бошқа топшириқларини бажариш учун қўмита аъзоларини белгилайди ва қонун ҳужжатларига мувофиқ бошқа ваколатларни амалга оширади.
Изоҳ (0)