To‘rtta viloyatning mahalliy kengashlariga raislar saylandi

5-noyabr kuni Xalq deputatlari Samarqand, Navoiy, Jizzax va Xorazm viloyatlari kengashlarining yettinchi chaqiriq birinchi sessiyalari bo‘lib o‘tdi. 

Sessiyalarda xalq deputatlari viloyatlar kengashlariga saylangan deputatlarning  partiya guruhlari ro‘yxatdan o‘tkazilib, viloyatlar kengashining reglamenti va doimiy komissiyalar to‘g‘risidagi nizomlari tasdiqlangan. Shuningdek, prezident taqdimnomasiga asosan viloyat hokimi lavozimiga tavsiya etilgan nomzodlar ko‘rib chiqilib, tasdiqlangan.

Yangi tahrirdagi O‘zbekiston Respublikasi konstitutsiyasining 120-moddasiga asosan viloyat, tuman, shahar hokimi lavozimini egallab turgan shaxs bir vaqtning o‘zida xalq deputatlari kengashining raisi lavozimini egallashi mumkin emas.

Shu munosabat bilan “Mahalliy davlat hokimiyati to‘g‘risida”gi qonunga muvofiq viloyatlar kengashlariga raislar saylandi.

Xalq deputatlari Samarqand viloyati kengashi raisligiga 11-Yangiqo‘rg‘on saylov okrugidan saylangan deputat, “Nuroniy” jamg‘armasi viloyat bo‘limi rahbari Shuhrat Xudoyberdiyevich Negmatov nomzodi ma’qullangan bo‘lsa, Xorazm viloyat kengashiga 14-G‘azovot  saylov okrugidan saylangan deputat, kengash kotibiyat mudiri Altibay Radjabov rais etib saylangan.

Shuningdek, Jizzax viloyati kengashi raisligiga 17-Saroylik saylov okrugidan saylangan deputat, “Nuroniy” jamg‘armasining Sharof Rashidov bo‘limi raisi Parda Shukurov, Navoiy viloyati kengashi raisligiga esa 30-Tamabahrin saylov okrugidan saylangan deputat, O‘zbekiston mahallalar uyushmasi Navoiy viloyati boshqarmasi boshlig‘i Aliyev G‘ofir Quvvatovich saylandi.

Avvalroq Oliy Majlis Qonunchilik palatasi spikeri o‘rinbosari Odiljon Tojiyev yangilangan konstitutsiyaga asosan endilikda hokimlar mahalliy kengashlarga rais bo‘lolmasligini eslatgandi.