14-noyabr kuni Nyu-Dehlini qoplagan quyuq tutun tufayli Indira Gandi xalqaro aeroportida 200 dan ortiq reyslar kechiktirildi.
Bu haqda aeroport saytida xabar berildi.
Shahardagi havo sifati indeksi 400 dan oshdi, normal darajada bu ko‘rsatkich 50 ni tashkil qilishi kerak edi. Bu havo ifloslanishining "og'ir" toifasi hisoblanadi.
Yo'llarda ko'rish sezilarli darajada qiyinlashdi. Aeroport maʼmuriyati yo‘lovchilarga quyuq tutun tufayli yuzaga kelishi mumkin bo‘lgan muammolar haqida bayonot berdi. Hindiston aviakompaniyalari samolyotlarning uchishi va qo‘nishi kechikishi haqida ogohlantirdi.
Kuniga 50 ta sigaret chekishga teng havo
Har yili noyabr va dekabr oylarida Nyu-Dehlida havo sifati keskin yomonlashadi. Bu poytaxt mintaqasiga qo'shni shtatlardagi o'rim-yig'imdan keyin sodir bo'ladi.
Fermerlar, taqiqlarga qaramay, tonnalab quruq o'tlarni yoqib yuborishadi. Natijada, quyuq tutun pastlikda joylashgan Nyu-Dehlini qoplaydi.
Hindistonlik olimlarning fikricha, bunday havoni yutish kuniga 50 ta sigaret chekish bilan barobar. Shifokorlar aholiga ko‘chaga chiqmaslikni, chiqishga majbur bo‘lganda, himoya niqoblaridan foydalanishni tavsiya qildi.
Nyu-Dehlidan qolishmayotgan Toshkent
So‘nggi vaqtlarda Toshkent shahrida ham havo sifatining yomonlashishi ko‘p bora kuzatilmoqda. Havo sifati indeksi (AQI) bo‘yicha jahon reytingida poytaxt Toshkent dunyodagi havosi yomonlashgan shaharlar ro‘yxatida qayd etilmoqda.
Tahlillarga ko‘ra, shaharda atmosfera havosining yomonlashuvida turg‘un manbalar va transport vositalarining ulushi yuqori hisoblanadi.
"Bugungi kunda Toshkent shahri atrofida 1314 gektar maydonda 631 ta issiqxona faoliyat yuritayotgani, ularning 60 foizi ko‘mirdan, ba’zan esa rezina shinalar va boshqa yonuvchi vositalardan foydalanayotganini inobatga olsak, shahar havosining yomonlashuvida issiqxonalarning ham zarari katta, deyish mumkin", deiladi Ekopartiya xabarida.
Xabarda Ekopartiya atmosfera havosi ifloslanishiga oid har qanday holatdan xavotirda ekanini bildirib, Ekologiya, atrof-muhitni muhofaza qilish va iqlim o‘zgarishi vazirligi va Bosh prokuratura tomonidan bu muammoga qarshi tezkor choralar ko‘rish zarurligini ta’kidlagan.
Shuningdek, bu borada belgilangan tartibda deputatlik so‘rovini kiritishini ham ma’lum qilgan.
Izoh (0)