Shakira Pike ustidan sudda g‘alaba qozonganidan so‘ng farzandlari bilan Barselonadan Mayamiga ko‘chib o‘tdi. Bu haqda u o‘zining ijtimoiy tarmoqlardagi sahifasida ma’lum qildi.
![](/static/nasiba/photo_2023-04-04_10-55-38.jpg)
“Men bolalarga barqaror hayotni ta’minlash uchun Barselonaga ko‘chib kelgandim. Hozirda biz xuddi shunday barqarorlikni dunyoning boshqa burchagida, oila, do‘stlar davrasida va dengizga yaqin joydan qidirmoqdamiz. Bugun biz baxtimizni izlashda yangi sahifani boshlaymiz. Barselonada yonimda bo‘lgan barchaga rahmat — bu joy do‘stlik sevgidan ko‘ra uzoqroq davom etishini anglagan shahrim”, — deb izoh qoldirgan xonanda.
Ispaniyaning La Vanguardia gazetasining ma’lumotiga ko‘ra, Shakira allaqachon Mayamiga uchib ketgan. Xonandaning o‘g‘illari 11-aprel kuni o‘sha yerdagi maktabga boradi.
Shakira noyabr oyida sud orqali farzandlarining vasiyligini olgan edi. Xonanda o‘g‘illari Mayamida u bilan yaxshiroq yashashini aytgan, chunki Barselonada ularni doimiy ravishda paparatssilar ta’qib qiladi. Pike esa bolalarning u bilan Kataloniyada yashashini xohlagan.
Shakira va Pike 2022-yilning iyun oyida ajrashishini e’lon qildi. Ular 2010-yildan beri birga yashab kelayotgan edi, biroq juftlik rasman turmush qurmagan. Mish-mishlarga ko‘ra, ularning ajrashishiga Pikening 23 yoshli sevgilisi bilan xiyonati sabab bo‘lgan.
Izoh (0)