Bugungi qahramonlarimiz dunyoning turli chekkalarida o‘z muxlislariga ega yulduzlardir. Ular o‘z ona tilidan tashqari boshqa xorijiy tillarda ravon so‘zlashish qobiliyati bilan barchamizga o‘rnak bo‘la oladi.
Shakira
Iste’dodli inson har sohada mahoratlidir, deb bejizga aytilmagan. Buning yaqqol namunasi — kolumbiyalik xonanda Shakira. U oltita tilda so‘zlasha oladi. Ispan va ingliz tilidan tashqari qo‘shiqchi arab, portugal, fransuz hamda italyan tillarini biladi.
Ingliz tilini Shakira kechroq o‘rgangan. Xonanda qo‘shiqlarida o‘z fikri va o‘ylarini auditoriyaga yetkazish hamda dunyo bo‘ylab ko‘proq muxlislar bilan muloqot qilish maqsadida ingliz tilini o‘rgangan.
Jennifer Lopes
Aktrisa va xonanda Jey Lo esa ikki tilda erkin gapiradi. Yulduz Nyu Yorkda tug‘ilib o‘sgan va uning talaffuzi amerikacha shevaga xosdir. Uning ota-onasi asli Puerto-rikolik bo‘lgani sababli xonanda bolaligidanoq ispan tilini ham oila davrasida o‘rganib kelgan. Shuning uchun Lopes ispan va ingliz tilini o‘z ona tili deb hisoblaydi.
Intervyulardan birida Jennifer ispan tilini sekin-asta unutib qo‘yayotgani haqida aytgan edi. Amerikada yashash va ishlash, to‘liq ingliz tilidagi muhitda bo‘lish o‘z ta’sirini ko‘rsatgan: hozirda xonanda ispan tilida tez-tez grammatik xatolarga yo‘l qo‘yadi va ba’zi so‘zlarni unutib qo‘yadi.
Tom Hiddlston
Tom Hiddlstondan intervyu olish jurnalistlar uchun juda qulay, chunki aktyor ularga muloqot tilini tanlash taklifini beradi. Uning ona tili ingliz tilidir. Tom ispan, fransuz, grek va hatto lotin tillarini ham biladi. Yulduz bularning barchasi unga turli xil rollarni ijro etish uchun yordam beradi, deb ta’kidlaydi.
“Maktabda yangi tillarni o‘rganishni boshlaganimda ularni o‘rganish men uchun qulay va oson ekanligini angladim va hozirda nemis tilini o‘rganishda davom etmoqdaman”, — deydi aktyor.
Sharliz Teron
Bunga ishonish qiyin, ammo aktrisa Sharliz Teron Janubiy Afrikada dunyoga kelgan. U ingliz va Afrikaans tilining 26 xil shevasini biladi. Aktrisaning bank xodimi bilan ingliz va afrikaans tilida so‘zlashayotgan kun kinodagi karyerasining boshlanishiga sabab bo‘lgan. Ikkita tilda ravon gapirayotgan qizni ko‘rgach, iste’dodlarni izlovchi agent unga filmda suratga tushishni taklif qilgan. Aktrisa tan olishicha, atrofdagilar uning so‘zlarini tushunmasligi uchun oila a’zolari bilan ataylab afrikaans tilida so‘zlashadi.
Natali Portman
Aktrisa vatani Isroil bo‘lib, ivrit va ingliz tilidan tashqari yapon, nemis, fransuz va ispan tillarida gaplasha oladi. Garvard universitetini tamomlagan aktrisa bir nechta ilmiy ishlarni yozishni ham uddasidan chiqqan. Fransuz tilida ham ravon so‘zlashishiga uning turmush o‘rtog‘i — fransiyalik Benjamin Milpye sabab bo‘lgan.
Qiziqarli fakt: Natali Portman o‘rgangan yana bir noodatiy til — bu imo-ishora bilan so‘zlashuv edi. 2011-yilda u Pol Makkartnining My Valentine klipida qo‘shiq so‘zlarini imo-ishora bilan tasvirlagan.
Izoh (0)