Ispaniya hukumati xonanda Shakirani soliqlarni to‘lamaganlik ayblovi bilan rasmiy ravishda sudga berishga qaror qildi. Esplugues de Llobregat shahar sudi ushbu ma’lumotni haqiqatan ham tasdiqlagan, ammo sud sanasi hali e’lon qilinmagan, deb yozadi “Lady.mail.ru”.
Prokuraturaning fikricha, qo‘shiqchi 2012—2014-yillarda Ispaniyada topgan daromadidan qirollik g‘aznasiga 14,5 million yevro (14 217 757 dollar) kam to‘lagan. Huquq-tartibot idoralari xonanda uchun sakkiz yillik qamoq jazosi va 23 million yevro (22 552 305 dollar) jarima so‘ramoqda.
Mashhur xonandaning yuristlari kutilayotgan sud jarayoni haqidagi xabarlarga allaqachon izoh bergan. “Shakirani sudga berish haqidagi buyruq shu kabi jarayondagi navbatdagi qadamdir. Vaziyat o‘zgarmadi, hamma narsa odatdagidek davom etmoqda. Barcha dalillar o‘z vaqtida taqdim etilib, vazifalar bajarildi”, — dedi uning advokati.
Shuningdek, qo‘shiqchining advokati uning Ispaniyada yiliga 183 kundan ortiq vaqt o‘tkazganiga to‘g‘ridan to‘g‘ri dalil yo‘qligini ta’kidlamoqda. Bu muddat shaxs avtomatik ravishda qirollikning soliq rezidenti bo‘ladigan davr. Xonanda advokatlarining ta’kidlashicha, u Ispaniyaga 2015-yilda ko‘chib o‘tgan va bundan oldin u Bagama orollarida soliq rezidenti bo‘lgan. Prokuraturaning fikricha, 2012-yilning may oyida Shakira Ispaniyadan uy sotib olib, uni ta’mirlashni boshlagan, shuningdek, ovoz yozish studiyasini bir yilga ijaraga olgan.
Qo‘shiqchining o‘zi avvalroq Ispaniya rasmiylari unga qarshi soxta ayblov qo‘yganini va o‘zi esa ular bilan kurashishga va’da berganini aytgan. Uning ta’kidlashicha, ish sudga oshmasidan oldin Ispaniya soliq idorasi unga taqdim etgan summani to‘lagan.
Shakira birinchi marta 2018-yilda soliq to‘lashdan bo‘yin tovlaganlikda ayblangan va 25 million dollar soliq to‘lagan. Keyinchalik ijrochi apellyatsiyaga bergan, biroq Ispaniya sudi uni rad etgan.
Izoh (0)