Qozog‘iston hozircha BRICS’ga qo‘shilish uchun ariza bermaydi, biroq mamlakat prezidenti Qosim-Jo‘mart To‘qayev Qozonda bo‘lib o‘tadigan tashkilot sammitida ishtirok etadi.
Prezident maslahatchisi hamda matbuot kotibi Berik Ualining ma’lum qilishicha, Qozog‘iston universal xalqaro tashkilot sifatida BMTga ustunlik beradi.
Uali Qozog‘iston prezidentiga mamlakatning BRICS’ga qo‘shilishi bo‘yicha takliflar tushgani va ularning har biri ko‘rib chiqilganini aytgan. U blokka qo‘shilishdan bosh tortishiga sabab sifatida a’zolik masalasini ko‘rib chiqishning ko‘p bosqichli jarayonini, shuningdek, “ushbu assotsiatsiyaning rivojlanish istiqbollari bilan bog‘liq boshqa masalalarni” ta’kidlagan.
Prezident maslahatchisi BRICS sammitida ishtirok etish To‘qayevning jadvalidan joy olganini qo‘shimcha qilgan. Unga ko‘ra, Qozog‘iston yetakchisi 24-oktyabr kuni tashkilotning kengaytirilgan yig‘ilishida nutq so‘zlamoqchi.
“Prezident BMTni universal va bahssiz tashkilot sifatida bir necha bor ta’kidlagan, unda barcha dolzarb xalqaro muammolar, jumladan adolatli dunyo tartibini barpo etish bilan bog‘liq masalalar muhokama qilinishi mumkin”, deydi maslahatchi.
Qozondagi BRICS sammiti uch kun, 22—24-oktyabr kunlari o‘tkazilishi hamda unda 30 dan ortiq davlat ishtirok etishi kutilmoqda. Joriy yilda Malayziya va Ozarbayjon tashkilotga a’zo bo‘lish uchun rasmiy arizalarni topshirgan. Bloomberg’ga ko‘ra, Turkiya ham ariza topshirgan, biroq Anqara buni hali rasman tasdiqlamagan. Burkina Faso va Shri Lanka ham BRICS’ga kirish istagini bildirgan.
Izoh (0)