O‘zbekiston Qozog‘istondan bug‘doy importini oshirdi

O‘zbekiston Qozog‘iston bug‘doyining asosiy importchisi bo‘lib qolmoqda. Bu haqda “APK-Inform” xabar berdi.

Qayd etilishicha, 2023—2024-yillarning sentyabr—fevral oylarida Qozog‘iston O‘zbekistonga 1,6 million tonna bug‘doy yetkazib bergan, bu o‘tgan mavsumning shu davriga nisbatan (1,529 million tonna) ko‘pdir.

Shu yilning fevral oyida eksport hajmi so‘nggi to‘rt oydagi eng yuqori ko‘rsatkichga yetgan — qariyb 296 ming tonna. Taqqoslash uchun 2023-yil fevral oyida eksport hajmi biroz ko‘proq — 313,5 ming tonnani tashkil etgan.

Spot’ning yozishicha, o‘tgan yilning yanvar—avgust oylarida O‘zbekiston Qozog‘istondan bug‘doy importini besh yil ichida rekord darajaga ko‘targan. Sakkiz oy yakunlariga ko‘ra, Qozog‘iston bug‘doyining O‘zbekistonga yetkazib berish hajmi 3,88 million tonnani tashkil etgan.

Mart o‘rtalarida Qozog‘iston bug‘doy importini vaqtincha taqiqlashi to‘g‘risida xabar berilgandi. Hujjat loyihasiga ko‘ra, mamlakat uchinchi davlatlardan va Yevrosiyo iqtisodiy ittifoqi davlatlaridan avtomobil, suv va temiryo‘l transporti orqali bug‘doy olib kirishga 6 oy muddatga taqiq joriy etish nazarda tutilgan.