Qozog‘iston va Xitoy o‘rtasidagi temiryo‘l chegaralaridagi vaziyat yil davomida diqqat markazida bo‘ldi. Do‘stlik chegara punktidagi so‘nggi o‘zgarishlar ham bunga ta’sir ko‘rsatdi. Bu haqda RailFreight ma’lumot berdi.
2024-yil boshida Qozog‘iston sig‘im cheklovlari sababli Xitoyga temiryo‘l orqali don eksportini to‘xtatgandi. Hozirgi vaqtda vaziyat yanada keskinlashib, Qozog‘istondan Xitoyga konteyner poyezdlarining jo‘natilishiga to‘liq taqiq ikki marta uzaytirildi va kamida noyabr oyigacha davom etadi.
Qozog‘iston rasmiylari taqiq sababini infratuzilma cheklovlari bilan izohlamoqda. Jumladan, “Do‘stlik” chegara punkti haddan tashqari yuklangan bo‘lib, sentyabr oxirida taxminan 55 ta konteyner poyezdi chegarada navbatda turgan.
Bu qoloqlik Qozog‘iston chegara obyektlarining ortib borayotgan konteynerlar oqimini boshqarish qobiliyati haqida savollar tug‘dirdi, deyiladi xabarda.
Xitoyga yo‘nalgan konteyner poyezdlarining to‘xtatilishiga qaramay, boshqa chegara punktlari faol bo‘lib, Xitoydan Qozog‘istonga qatnovlar davom etmoqda. Biroq mavjud vaziyatning kengroq ta’siri borasida qarama-qarshi fikrlar yuzaga kelgan.
Rossiyaning Asia Import Group logistika kompaniyasining so‘nggi bayonoti vaziyatni yanada murakkablashtirmoqda.
Kompaniyaning ta’kidlashicha, “Xitoydan Qozog‘iston orqali Rossiyaga temir yo‘l transportida yuk tashish deyarli imkonsiz holga kelgan.
Ular “Do‘stlik” chegara punktidagi tirbandlik tufayli sezilarli kechikishlar yuz berayotganini aytmoqda. Bunda, yuklarning haddan tashqari ko‘pligi va temir yo‘l platformalarining yetishmasligi sababli, yuklar ko‘pincha stansiyada bir oy yoki undan ortiq vaqt kutib qolmoqda. Kompaniya bu holatni Rossiyaning Uzoq Sharqidagi vaziyat bilan taqqoslaydi, u yerda shunga o‘xshash muammolarni hal qilish uchun muqobil transport usullari qo‘llanilmoqda.
Aksincha Xitoyning Tiedada logistika kompaniyasi “Do‘stlik” chegara o‘tish punktidagi vaziyatni odatiy holat deb ta’kidlamoqda.
Xitoyga kirib kelayotgan yuqori hajmdagi g‘alla, foydali qazilmalar va yog‘och mahsulotlari, shuningdek Rossiyadan muntazam import qilinayotgan tovarlarning uyg‘unlashuvi chegarada vaqti-vaqti bilan tirbandlikka sabab bo‘lmoqda, tushuntirdi kompaniya.
Tiedada buni favqulodda hodisa emas, balki mavsumiy qonuniyat sifatida baholab, yaqin kelajakda vaziyat yaxshilanishini prognoz qilmoqda.
Bundan tashqari, kompaniya Xitoy—Yevropa yo‘nalishi bo‘ylab yuk tashish “Do‘stlik”dagi tirbandlikdan kelib chiqmayotganini ta’kidlaydi. Ular so‘nggi paytlarda Yevropaga eksport hajmining pasayishini chegaradagi kechikishlar bilan emas, balki asosan dengiz orqali yuk tashish narxlarining tushishi bilan izohlaydi.
Izoh (0)