Qozog‘iston va Afg‘oniston o‘rtasidagi tovar ayirboshlash hajmi 1 milliard dollarga yetdi. Bu haqda respublika bosh vazir o‘rinbosari, savdo va integratsiya vaziri Serik Jumangarin xabar berdi.
“Daryo”ning Qozog‘istondagi muxbiri vazir nutqiga tayanib, ikki davlat o‘rtasidagi savdo aloqalari yanada oshishini ma’lum qildi. Serik Jumangarin Qozog‘iston bunday imkoniyatdan voz kechmasligi kerakligini bildirdi. Hukumat rasmiysi bundan ham ko‘proq, iqtisodiy maqsadlar uchun yangi aloqalarni o‘rnatish kerakligi, bunda siyosat va savdo bir-biridan ajralib turishini aytdi.
“Siyosat siyosat yo‘lida, iqtisod esa iqtisoddir. Biz ushbu savdo hamkorligini oshiramiz. Bizda bug‘doy, un va kungaboqar yog‘i yetkazib berishning real istiqbollari bor. Nega bu imkoniyatdan voz kechishimiz kerak? Bu pirovardida davlatimizga foyda keltiradi”, — dedi Jumangarin.
Savdo vazirligi rahbari afg‘on ishbilarmonlarini Qozog‘istonga mamlakat bozorini ko‘rish va o‘rganish uchun taklif qilmoqchi ekanini aytdi.
“Afg‘on ishbilarmonlarini shu yerda biznes-forum o‘tkazishga taklif qilmoqchiman. Ular Qozog‘istonni, bizning imkoniyatlarimizni ko‘rsin. Oxirgi marta Afg‘onistonda nafaqat mahsulot bilan shug‘ullanuvchilarni, balki yer qa’ridan foydalanuvchilarni ham olib bordik. Chunki u yerosti boyliklaridan foydalanish jihatidan ancha boy mamlakat. Ularda bunga qiziqish uyg‘ondi”, — deydi Jumangarin.
Uning qayd etishicha, Qozog‘iston allaqachon Afg‘onistonda savdo uyini ochgan va o‘z vakilini tayinlagan. Eslatib o‘tamiz, avvalroq Qozog‘iston rasmiylari afg‘on diplomatlarini akkreditatsiyadan o‘tkazishga ruxsat bergan edi.
Talgat Satibaldi, Ostona
Izoh (0)