Qozog‘iston bug‘doy importini taqiqladi

Qozog‘iston hududiga 21-avgustdan boshlab bug‘doy olib kirishga taqiq joriy etiladi. Bu haqda Qishloq xo‘jaligi vazirligi xabar berdi.

Vazirlikka ko‘ra, birinchi yarim yillikda bug‘doy importi 1,3 million tonnani tashkil etdi, bu 2023-yildagi yillik import hajmiga deyarli teng, Qozog‘iston ichki bozorida esa o‘tgan yilgi bug‘doy zaxirasi yetarli.

Bu yil g‘alla hosili mo‘l bo‘lib, o‘tgan yildan qolgan zaxiralar bilan birgalikda don bozorida talab-taklif muvozanatini buzadigan darajada ortiqcha mahsulot paydo bo‘lishi kutilmoqda.

Shu sababli Qozog‘iston hududiga uchinchi mamlakatlardan va Yevrosiyo iqtisodiy ittifoqi davlatlaridan barcha turdagi transport vositalari orqali bug‘doy olib kirishni taqiqlash to‘g‘risida qaror qabul qilindi. Qishloq xo‘jaligi vazirligining buyrug‘i 21-avgustdan kuchga kiradi va 2024-yil 31-dekabrga qadar amal qiladi.