Rossiya prezidenti Vladimir Putin rahbarligida mamlakat Xavfsizlik kengashining navbatdan tashqari yig‘ilishida Donetsk hamda Lugansk Xalq Respublikalari mustaqilligini tan olish masalalari muhokama qilindi. Bu haqda Meduza xabar bergan.
Xavfsizlik kengashi yig‘ilishining boshida Rossiya TIV rahbari Sergey Lavrov NATOning sharqda qo‘shinlarini kengaytirmasligining kafolatlari bo‘yicha diplomatik ishlar haqida, Rossiya prezidenti administratsiyasi rahbarining o‘rinbosari Dmitriy Kozak esa Minsk kelishuvi shartlariga rioya qilish xususida hisobot berdi.
Xususan, Kozak Donbassning Ukrainaga ham G‘arbga ham kerakmasligi, Ukraina hukumati Donbassni mamlakat tarkibiga qaytarib olmoqchi emasligini ta’kidladi.
Rossiya federal xavfsizlik xizmati rahbari Aleksandr Bortnikov Rossiya hamda Ukraina chegarasidagi qo‘poruvchi guruhlar, shuningdek Ukraina harbiylari asirga olingan odamlar, Donbassdan Rossiyaga kelgan 68,5 ming qochoq to‘g‘risida ma’lumot berdi.
Rossiya mudofaa vaziri Sergey Shoygu Donbassda bir kechaning o‘zida 40 dan ziyod otishma sodir bo‘lgani, Donetskda suv ta’minotidan uzilib qolgan aholi va infratuzilma obyektlariga yetgan talafotlar haqida gapirdi.
Shoyguning so‘zlariga ko‘ra Donbassda 59,3 ming ukrainalik harbiylar, 345 ta tank, 2160 ta harbiy zirhli mashina, “Smerch” raketa o‘rnatmalari, “Tochka-U” raketa komplekslari va boshqa texnikalar mavjud. Shuningdek, Rossiya mudofaa vaziri Ukrainaning o‘ziga yadro mamlakati maqomini qaytarib olishga tayyorligini ta’kidladi.
Amaldorlarning hisobotlari va nutqlaridan keyin Putin Donetsk hamda Lugansk Xalq Respublikalarining mustaqilligini tan olish masalasini hal etish kerakligini bildirdi va so‘z navbatini Xavfsizlik kengashi raisining o‘rinbosari Dmitriy Medvedevga berdi.
Medvedev Lugansk va Donetsk viloyatlari aholisi Ukrainadan ancha vaqtdan beri hech qanday ijtimoiy yordam olmagani, aksincha ularga nisbatan zo‘ravonlik holatlari ko‘payib borayotganini qayd etdi. Medvedev 2008-yilda prezident lavozimida ishlagan paytida Janubiy Osetiya va Abxaziya mustaqilligining tan olinganini esladi. Medvedev yig‘ilish ishtirokchilariga o‘tmishdagi tajriba LXR va DXR mustaqilligini tan olish bilan bog‘liq vaziyatning doimiy ravishda sovuqlashib borishini taxmin qildi.
Keyin Davlat dumasi spikeri Vyacheslav Volodin va Federatsiya kengashi spikeri Valentina Matviyenko nutq so‘zladi, ular Putindan LXR hamda DXR mustaqilligini tan olishni so‘radi. So‘ngra Xavfsizlik kengashi kotibi Nikolay Patrushev LXR va DXR mustaqilligini tan olish — masalani hal etishning yagona yo‘li ekanligi, bosh vazir Mixail Mishustin esa Rossiya bir necha oydan beri sanksiyalarga tayyorlanayotganini qayd etdi. Rossiya tashqi razvedka rahbari Sergey Narishkin G‘arbning Kiyevni Donbass muammosini kuch ishlatib hal etishga chorlayotgani, Rossiya bunga yo‘l qo‘ymasligi zarurligini bildirdi. Putin Narishkindan LXR va DXR mustaqilligini tan olish haqida to‘g‘ridan to‘g‘ri javob berishni talab qildi.
Rossiya ichki ishlar vaziri Vladimir Kolokoltsev respublikalarni Ukraina hukumati bostirib kirgan chegaralar qismida mustaqil deb e’lon qilishni taklif etdi.
Shuningdek, Rossiya prezidentining Markaziy federal okrugdagi ishonchli vakili Igor Shegolyev ham yig‘ilishda o‘z fikr-mulohazalarini bildirib o‘tdi.
Yig‘ilish yakunida Putin hamkasblarining taklifini diqqat bilan tinglagani va bugunning o‘zida bu borada yakuniy qaror qabul qilinishini va’da qildi.
Avval xavfsizlik kengashi yig‘ilishda oldin DXR va LXR rahbarlari Putinga ushbu respublikalar mustaqilligini tan olish, so‘ngra do‘stlik hamda hamkorlik to‘g‘risida kelishuv imzolashni so‘rab murojaat yo‘llagani haqida xabar berilgandi.
15-fevralda Rossiya davlat dumasi deputatlari DXR va LXR mustaqilligini tan olish haqida mamlakat prezidentiga murojaat to‘g‘risidagi qarorni qabul qilgan. Hujjat Rossiya Federatsiyasi kommunistik partiyasi tomonidan tayyorlangan. Ovoz berish jarayonlari yakuniga ko‘ra Davlat dumasi spikeri Vyacheslav Volodin murojaatning darhol imzolanishi va Vladimir Putinga yo‘naltirilishini bildirgan.
Izoh (0)