Yevrokengash raisi Sharl Mishel mamlakatdan qochib ketmoqchi bo‘lgan Rossiya fuqarolarini o‘z hududiga kiritishi kerakligini ma’lum qildi, deb yozadi Meduza.
“Yevropa ittifoqi o‘z siyosiy qarashlari tufayli xavf ostida bo‘lganlarni qabul qilishi kerak. Agar Rossiyada odamlar o‘z siyosiy qarashlari sababli, ular Kremlning Ukrainada urush boshlashga oid tentakona qarorini qo‘llab-quvvatlamasligi sababli xavf ostida bo‘lsa, biz buni hisobga olishimiz kerak. Yangi holat yuzaga kelgani — Rossiyada qisman safarbarlik e’lon qilingani munosabati bilan sa’y-harakatlarimizni tezlikda muvofiqlashtirishimiz kerakligiga qo‘shilaman”, — dedi Mishel.
Avvalroq bir qator yevropalik siyosatchilar — xususan, Litva tashqi ishlar vaziri — ularning mamlakatlari safarbarlikdan qochayotgan rossiyaliklarga boshpana bermasligini ma’lum qilgandi. Yevropalik ba’zi huquqshunoslar qayd etishicha, bunday siyosat Qochqinlar maqomi to‘g‘risidagi konvensiyaga va Yevroittifoqning boshpana taqdim etish to‘g‘risidagi qonuniga ziddir.
Shuningdek, Germaniya muayyan holatlarda Rossiya armiyasi dezertir (qochoq)lariga va “Putin rejimiga qarshi bo‘lganlar”ga boshpana berishga tayyorligini bildirgandi. Ayni vaqtda Chexiya Tashqi ishlar vazirligi mamlakat safarbarlikdan qochayotgan Rossiya fuqarolariga gumanitar vizalar bermoqchi emasligini ma’lum qildi.
Rossiyada nimalar bo‘lyapti?
21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.
Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi. Xizmat o‘tab bo‘lgan, harbiy-hisob mutaxassisligi va jangovar tajribaga ega bo‘lganlargina chaqiriladi. Talabalar va shoshilinch xizmat harbiy xizmatchilari safarbar etilmaydi, degan edi Shoygu.
Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.
Izoh (0)