Rossiyaning keng ko‘lamli bosqini boshlanganidan so‘ng armiya yoshidagi olti mingdan ortiq Ukraina fuqarolari Ruminiyaga noqonuniy ravishda ko‘chib o‘tgan va u yerdan vaqtinchalik boshpana olgan. Bu haqda Ruminiya immigratsiya organlarining ma’lumotlarida aytiladi. BBC nashrining yozishicha, ular orasida armiyaga chaqirilishdan qo‘rqqanlar ham, jangovar harakatlarda qatnashib, harbiy xizmatni tark etganlar ham bor.
Jurnalistlarning ta’kidlashicha, Ukrainada harbiy xizmatga chaqirish jarayoni “qiyinchiliklar” bilan kechadi, harbiy xizmatchilarni yollashda korrupsiya katta muammo hisoblanadi. BBC manbalariga ko‘ra, ba’zi odamlar harbiy xizmatga chaqirilmaslik uchun har oy pora berib turadi.
Yana 20 ming kishi Ruminiyaga qonuniy yo‘l bilan ko‘chib o‘tgan, ammo ular orasida ham buni pora yordamida uddalaganlar bor. Chegarani noqonuniy kesib o‘tganlar tom ma’noda o‘z hayotini xavf ostiga qo‘ygan. Norasmiy maʼlumotlarga ko‘ra, chegara hududida 90 kishi halok bo‘lgan: baʼzilari chegara uchastkalaridan birida ikki davlatni ajratib turuvchi Tisa daryosiga cho‘kib ketgan, baʼzilari tog‘larda muzlab qolgan.
Frontdan qochgan harbiyning hikoyasi
BBC jurnalistlari Ukrainadan Tisa daryosini kechib o‘tib qochgan harbiy xizmatchilardan biri haqida hikoya qildi. U rus bosqini boshlanganidan bir oy o‘tgach frontga jo‘natilgan. Birinchi jangda, uning so‘zlariga ko‘ra, 27 nafar quroldoshi halok bo‘lgan, yana 57 nafari yaralangan. Ko‘p o‘tmay u harbiy bo‘linmasi joylashgan hududdan qochib ketgan — Ukrainani sharqdan g‘arbga kesib o‘tish uchun unga bir necha hafta kerak bo‘lgan; yordam uchun “gidlar”ga bir necha ming yevro to‘lagan.
Qochoq askar Ruminiya qirg‘oqlariga yetib borgach, uni ukrainalik patrul payqab qolgan. Ammo u ogohlantiruvchi o‘qlardan qo‘rqmaganini aytdi: “Agar frontda xizmat qilgan bo‘lsangiz, havoga otilgan o‘q bilan sizga qarata otilgan o‘qning farqiga borasiz”.
Tog‘ oshib o‘tgan ukrainalikning hikoyasi
BBC’ning yana bir suhbatdoshi harbiy komissiyadan armiyaga chaqiruv qog‘ozini olgach qochishga qaror qilganini aytdi. U to‘rt kishi bo‘lib Karpatdagi Marmarosh tog‘ tizmasi orqali chegarani kesib o‘tgan. Yo‘lda ular qor bo‘roniga tushib qolgan. Bir kishi vafot etgan. BBC suhbatdoshi tog‘ tizmasidan tushish vaqtida yiqilib, etik va paypog‘idan ayrilganini, sovuq urgani sabab keyinchalik uning barmoqlarini kesib tashlashganini aytib berdi.
Erkak tog‘larda uch kecha va to‘rt kunduz vaqt o‘tkazgan, ruminiyalik qutqaruvchilar uni “chalajon” holda topishgan. Jurnalistning agar qochganingiz uchun qo‘rqoq deb atashsa, nima deysiz, degan savoliga u shunday javob berdi: “Mening vatanim yo‘q. Faqat oilam bor”.
Izoh (0)