Yangihayot tumani aholisi uchun dam olish, sport, ko‘ngilochar va savdo imkoniyatlarini taqdim etadigan jamoat savdo-ko‘ngilochar bulvari yaratilishi rejalashtirilmoqda. Bu haqda Toshkent shahar hokimligi xabar berdi.
Hokimlik “Toshkent Invest kompaniyasi” AJ bilan birgalikda tadbirkorlarni davlat-xususiy sherikligi asosida barpo etiladigan ushbu loyihaga taklif qilmoqda.
Maʼlum qilinishicha, mazkur bulvar — bolalar bilan dam olish, gastronomiya, ko‘ngilochar tadbirlar va shahar hayoti birlashadigan joy bo‘ladi.
Loyiha shahar uchun noyob va jozibador, chunki inshootlar yengil konstruksiyalardan quriladi, bu esa tumanga o‘ziga xos muhit yaratib, shahar aholisini jalb qiladi, shuningdek, investorlar uchun qurilish jarayonini tezlashtiradi. Loyiha dastlabki tarzda quyidagilarni o‘z ichiga oladi:
- gastronomik hudud: qahvaxonalar, restoranlar, tez taomlar va boshqalar;
- sport hududi: fitnes markazi, basketbol maydonchasi, futbol maydoni va ko‘cha sporti uchun boshqa inshootlar, shuningdek, sport tovarlari do‘konlari;
- savdo hududi: kiyim-kechak do‘konlari, eko bozor va boshqa savdo binolari;
- bolalar ko‘ngilochar hududi: batut markazi, o‘yin maydonchalari va bolalar avtodromi.
Loyiha maydoni 3,1 gektar, uzunligi 1 km bo‘lishi kutilmoqda. Loyiha hududida 250 ta konteyner joylashadi. 4 ta funksional zona barpo etiladi.
“Obyekt davlat-xususiy sheriklik sharoitida investorga uzoq muddatga ijaraga topshirilishi mumkin”, deyiladi xabarda.
Izoh (0)