Янгиҳаёт тумани аҳолиси учун дам олиш, спорт, кўнгилочар ва савдо имкониятларини тақдим этадиган жамоат савдо-кўнгилочар бульвари яратилиши режалаштирилмоқда. Бу ҳақда Тошкент шаҳар ҳокимлиги хабар берди.
Ҳокимлик “Тошкент Инвест компанияси” АЖ билан биргаликда тадбиркорларни давлат-хусусий шериклиги асосида барпо этиладиган ушбу лойиҳага таклиф қилмоқда.
Маълум қилинишича, мазкур бульвар — болалар билан дам олиш, гастрономия, кўнгилочар тадбирлар ва шаҳар ҳаёти бирлашадиган жой бўлади.
Лойиҳа шаҳар учун ноёб ва жозибадор, чунки иншоотлар енгил конструкциялардан қурилади, бу эса туманга ўзига хос муҳит яратиб, шаҳар аҳолисини жалб қилади, шунингдек, инвесторлар учун қурилиш жараёнини тезлаштиради. Лойиҳа дастлабки тарзда қуйидагиларни ўз ичига олади:
- гастрономик ҳудуд: қаҳвахоналар, ресторанлар, тез таомлар ва бошқалар;
- спорт ҳудуди: фитнес маркази, баскетбол майдончаси, футбол майдони ва кўча спорти учун бошқа иншоотлар, шунингдек, спорт товарлари дўконлари;
- савдо ҳудуди: кийим-кечак дўконлари, эко бозор ва бошқа савдо бинолари;
- болалар кўнгилочар ҳудуди: батут маркази, ўйин майдончалари ва болалар автодроми.
Лойиҳа майдони 3,1 гектар, узунлиги 1 км бўлиши кутилмоқда. Лойиҳа ҳудудида 250 та контейнер жойлашади. 4 та функсионал зона барпо этилади.
“Объект давлат-хусусий шериклик шароитида инвесторга узоқ муддатга ижарага топширилиши мумкин”, дейилади хабарда.
Изоҳ (0)